Parlamentario Hendrik Tevreden (MEP): Na 2025 ta bay intensifica locual ta prevencion na Aruba

Cuido di salud ta algo hopi importante. Esey ta loke Parlamentario, Lider di Fraccion di MEP, Hendrik Tevreden a trece dilanti remarcando cu pa 2025 e intensificacion di e programanan di cuido y prevencion lo bay ta sublime.

   El a agrega cu na Aruba ta conoci e cifranan di diabetes, di hipertension, cu ta sumamente halto. Den combersacion cu algun persona cu ta traha den e parti di dialyze, nan a indica cu tin un lista di spera cu mester atende cu ne.

  P’esey ta importante pa anuncia na comunidad cu na 2025 e trabaonan riba prevencion ta bay ta intensivo. Esaki lo yuda tambe pa por baha a termino largo, e gastonan di cuido medico, Tevreden a señala.

Parlamentario Tevreden a sigui bisa cu e lunanan binidero ta bay mira cu remedinan lo ta bek ariba e asina yama ‘Lista Positivo di Remedi’. Esaki ta nifica cu lo duna bek na e grandinan, specialmente esnan cu ta haya falta di nan remedi, e parti di remedinan aki bek.

Ta importante pa esnan cu tin malesanan cronico nota esaki ya cu hopi biaha no ta splica esaki na nan dokter di cas of na nan specialista, ora di bay botica pa haya e remedinan aki. Sinembargo, e otro remedinan cu tabatin dificultad pa ricibi nan, esaki ta bay wordo soluciona den e lunanan nos dilanti.

Esaki sigur ta un bon noticia pa tur esnan cu ta uza remedinan pa malesanan cronico, cu e problema aki tin un solucion na dje. “Mi ta kere cu ta importante pa awe notifica esaki na e comunidad en general riba e tematica aki di remedi”.

Nos plan pa loke ta salubridad publico ta uno masivo, hopi grandi y elabora. Pero principalmente e concentracion lo bay ta na 2025 siguramente ariba locual ta prevencion. Specialmente ariba prevencion di diabetes y tambe hipertension”, e parlamentario a enfatisa.

El a yama danki na tur esnan cu a bin ta trahando pa hopi tempo ariba e programanan aki cu ta bay cuminsa na 2025. Tambe el a yama danki na esnan cu ta bin ta bringando pa e remedinan aki por bay riba e lista positivo bek, sin problema y sin pago. Esaki lo bira un realidad pronto pa henter e comunidad, el a finalisa bisando.