Cada temporada di eleccion un discusion ta surgi riba e tema di “cuanto tempo liber nos tin riba dia di eleccion”. Aruba Trade and Industry Association (ATIA) ta desea di duna comercio y pueblo di Aruba un splicacion practico riba e tema aki.
Tempo liber riba dia di Eleccion
Pa por elabora riba e pregunta, si un empleado mester haya tempo liber pa eherce su derecho pa vota riba dia di Eleccion, ATIA ta informa lo siguiente. Tanto e Codigo Civil (Burgerlijk Wetboek) y e “Kiesverordening” ta stipula cu un empleado tin derecho riba tempo liber pa por haci uzo di su derecho di vota. Segun e Kiesverordening, un dunado di trabou ta obliga pa otorga riba dia di eleccion, entre e ora nan di 8’or di mainta pa 7’or di anochi, cuatro (4) ora laboral paga consecutivo na su empleadonan cu tin derecho pa vota, a menos cu e empleado ya caba tin liber pa otro rason riba dia di Eleccion.
Ken tin derecho pa vota
Pa un persona tin derecho pa vota, e mester cumpli cu lo siguiente:
- Nacionalidad Hulandes.
- Residente di Aruba.
- Mester tin 18 aña di edad riba dia di Eleccion.
- Mester ta registra den registro civil (Bevolkingsregister) riba 18 september 2024.
- Mester a haya su “oproepingskaart”. Si un empleado no a ricibi su oproepingskaart, e por puntra pa un duplicado na Censo. Tuma nota: un doño di trabou tin e derecho pa puntra un empleado pa mustra su “oproepingskaart”.
Kico por ta otro rason?
Otro rason por ta por ehempel:
- E empleado ya caba tin liber riba dia di eleccion.
- Empleado ta traha part time y tin 4 ora consecutivo liber den orario cu urnanan ta habri riba dia di Eleccion.
- Si e empleado a pidi mitar dia liber.
- Si e empleado tin “bijzonder verlof” pasobra por ehempel su yiu a nace.
Empleadonan cu ta liber pa un of otro rason no ta bin na remarca pa e 4 ora nan liber obligatorio y tin cu bai vota den nan mes tempo liber.
Obligacion pa duna liber riba dia di Eleccion
Un dunador di trabou ta obliga pa informa su empleadonan por lo menos un siman adelanta, ki nan orario di trabou lo ta, y alaves nan oranan liber, pa por bai eherce nan derecho pa vota riba dia di eleccion.
Tabla di tempo liber
ATIA ta comparti e tabla aki cu ta resumi e diferente wardanan (“shifts”) (parti ariba) compara cu e ora nan cu e urnanan ta habri (celnan preto).
Segun e tabla, solamente empleadonan cu ta traha e wardanan di 7am – 4pm, 8am-5pm, 9am-6pm, 10am-7pm y 11am-8pm tin derecho pa haya 4 ora liber cu pago riba dia di Eleccion. Tur otro warda, e empleado tin por lo menos 4 ora pa vota prome of despues di trabou.
En conclusion, ATIA ta informa tur dunado di trabou y nan empleadonan pa tene tur e punto nan treci dilanti den e articulo aki pa dia di eleccion, bon na cuenta. Asina tur hende por eherce nan derecho di voto na un manera trankilo y sano riba 6 december proximo.
Pa finalisa ATIA kier a recorda tur hende pa haci bon uso di nan derecho di voto y pa haci esaki conscientemente. Si tin algun pregunta riba e articulo of kier mas informacion, por tuma contacto cu ATIA libremente na info@atiaruba.org, of via nos linea Whatsapp 582-7593.
###
ATIAAruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org, y nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association
