Cu hopi interes mi a lesa e remitido ariba FaceBook cu un yamada na publico general pa bira un boluntario, miembro di e comision di un urna electoral (Stembureau) aki na Aruba. Esaki en bista di e eleccion benidero. Ami como pensionado a dicidi den mi enthousiasmo pa reacciona ariba e yamada aki. E yamada no ta contene ningun exigencia pa bin na remarca pa bira miembro, solamente mester ta un votado (18 aña bai ariba y ta un Hulandes) y tambe cu mester tin permiso di e dunado di trabao pa ta presente henter e dia di eleccion. Ami como pensionado no tin e problema ey.
Grandi tabata mi sopresa cu riba dia 23 di november 2024 mi a ricibi un mail di sra. Marjetie Lai-Ping Franzy Hsing, Allround Medewerker Gegevensverwerking di Censo Aruba cu ta bisa cu mi a wordo apunta como e di tercer miembro di e comision electoral di urna #43 na Colegio Laura Wernet- Paskel na Cadushi Largo. Segun e decision e siguiente personanan a wordo apunto como miembro di e urna electoral #43:
1. Sra. Dulcela Laurina Jeanette Medora Hunt (Presidente)
2. Sra. Brigida Hipólita Angela (secundo miembro)
3. Sr. Leopoldo Rosario Henriquez (tercer miembro)
4. Sra. Aislynn Alexandrine Geerman (prome reemplasante)
5. Sra. Laura Bernarda Garcia Palacios (secunda reemplasante).
Den e mesun mail e personan miembro di e urna electoral #43 a ricibi un invitacion pa participa na un merdia / anochi informativo tocante e organisacion di e dia di vota cu ta dia 6 di december 2024. Y tambe a ricibi e guia 2024 (Leidraad voor de voorzitters en leden van de stembureaus versie 2024) cu Titulo Sea informa, Scohe y Vota 2024 cu informacion con e votamente ta bai y cua miembro tin cua tarea e dia ey. Den un mail antes di Sra. Marjetie Lai-Ping Franzy Hsing di 2 di november 2024 a wordo puntra pa ya cuminsa pasa door di e guia pa haya sa kiko e funccion y tareanan di cada miembro lo ta e dia di eleccion.
Ami door di mi enthousiasmo mi a lesa e guia tres bes, ya cu mi ta di edad halto pa asina mi por hinca den mi cabez kiko ta mi funccion y tareanan.
Mi a participa cu hopi interes na e dia merdia y anochi di 28 di november 2024 den Grand Ballroom na Marriott. Loke ta m’a ripara ta cu mas cu 80% di e personanan presente tabata femenino, cual no ta un refleccion di populacion di Aruba. Mi sa sigur cu e porcentahe hende femenino ta mas abao. Eynan mi a bin topa dos di nos miembronan di urna electoral #43 cu ta sra. Aislynn Geerman y sra. Laura Garcia Palacios. Sra. Aislynn Geerman a informa mi persona cu ta pe ta prome biaha cu e ta participa na e actividad asina y di mi banda mi a bisa sra. Geerman cu pami tambe ta prome biaha. Lamentablemente ni e presidente di nos urna, sra. Dulcel Hunt, y tampoco e secundo miembro, sra Brigida Angela, a presenta. Despues di un ora a bin na nos mesa un señora di e Conseho Electoral cu a entrega nos e T shirts y a informa nos cu e no ta compronde di con sra. Hunt ni sra. Angela no a bini y cu tampoco nan no a informa e organisacion di nan ausencia. Nos a contesta cu ta falta di respet. Na final mi a pasa cerca e mesun señora ey pa puntre kico lo bay pasa awor cu sra. Hunt ni e otro no a parece. Anto e la contami cu e lo informa e Comision General di e urnanan pa tende kico lo wordo haci anto lo nan informa nos kico lo bai pasa.
Grandi tabata e sorpresa di lesa den un mail poco dia prome cu eleccion, riba 2 di december 2024, ricibi di sra. Marjetie Lai-Ping Franzy Hsing di Censo cu e funccionnan di e miembronan a wordo cambia diripiente den e siguiente:
1. Sra. Dulcela Laurina Jeanette Medora Hunt (Presidente)
2
2. Sra. Aislynn Alexandrine Geerman (secundo miembro)
3. Sra. Melanie Josyanne Albertus (tercer miembro)
4. Sr. Leopoldo Rosario Henriquez (prome reemplasante)
5. Sra. Laura Bernarda Garcia Palacios (secunda reemplasante).
Mesora mi a manda un contesta pa mail pa sra. Marjetie Lai-Ping Franzy Hsing di Censo pa puntra kiko a pasa y di con tabata tin un cambio. Ya cu ningun motivacion of hustificacion a wordo presenta pa cu cambio aki. Mi a manda un mail cu mesun contenido pa cu Conseho General di Eleccion (Electorale Raad van Aruba), pa medio di e secretaria sra. Sahaira Kelly. Di e ultimo ey mi no a ricibi te awe ningun contesta.
Pero mientrastanto sra. Aislynn Geerman ta informa mi via WhatsApp cu prome cu e cambio a wordo comunica na nos, e la wordo yama pa informe cu su funcion a cambia. Sra. Geerman ta haya esaki straño tambe. Mi persona no a ricibi ningun telefon tocante mi cambio.
Dia 3 di december 2024 sra. Marjetie Lai-Ping Franzy Hsing di Censo ta informa mi den un mail cu pa e proceso bai mas optimal nan a dicidi di haci e cambio a base di expertisio. Di biaha mi a contesta sra. Marjetie Lai-Ping Franzy Hsing di Censo back cu e unico experticio cu por ta ta cu un persona ya den pasado a yega di funcciona como miembro di un urna electoral. Y cu by the way esaki no ta experticio pero experiencia. Y mi a referi na sra. Aislynn Geerman cu segun e cambio a bira miembro number 2 di e comission di e urna electoral #43 mientras cu e nunca yega di funcciona como un miembro. Y tambe cu sra. Hunt no aparece e dia informativo ni sikiera pa siña conoce nos. Y tambe cu diripiente un persona cu nunca a wordo menciona awor a tuma mi luga como di tres miembro di e urna electoral #43. Y mi a informa sra. Marjetie Lai-Ping Franzy Hsing di Censo cu mi tin obhecion y cu mi no ta di acuerdo cu e cambio como cu mi a hinca bastante energia den esaki caba. Mi a informa sra. Marjetie Lai-Ping Franzy Hsing di Censo cu si un ambtenaar tuma un decision e mester uza e principionan di “Algemene Beginselen van behoorlijk bestuur” pa informa esnan envolvi di con esaki a wordo tuma.
Awe dia 4 di december 2024 sra. Marjetie Lai-Ping Franzy Hsing di Censo ta yamami pa papia cu mi finalmente. Despues cu a informa mi cu no ta e a dicidi esaki, e la bisami kico mi ta bay haci. Den e combersacion telefonico e ta pone presion riba mi manera: “take it or leave it”, esta mi mester dicidi e ora ey pa asina nan por sigui. Mi informa sra. Marjetie Lai-Ping Franzy Hsing di Censo claramente cu mi no ta acuerdo. Anto e ora y sra. Marjetie Lai-Ping Franzy Hsing di Censo a tuma e decision di saca mi completo for di e lista di miembronan di urna #43.
Corda bon cu ami ta boluntario cu door di mi enthousiasmo mi a pone mi mes disponibel pa contribui na algo bon pa Aruba, asina hinca energia y tempo den esaki, cumpliendo cu tur locual a pidi pa te na final hala mi un banda sin motibo valido. Eski ta un trato di falta di respet y dignidad y den contexto di algo asina importante manera un eleccion, falta di seriedad y profesionalismo di ambtenaar.
Ta pesey a base di loke a pasa, mi conclusion ta cu ningun di nos di Aruba mester para como boluntario na un urna electoral durante un eleccion, tanten ta haci y deshaci di hende sin motibo y hasta nombra hende den urna cu no ta tuma e trabao serio.
Leopoldo Henriquez
