Den sindicalismo parce a bira moda cu no ta tene eleccion mas. E sindicato TOPA a pasa 15 aña sin tene eleccion, awor cu un directiva nobo, nan ta bay biento en popa. Den SEPPA, parce cu Magali Brito kier kibra e record di 15 aña. Statutonan di SEPPA ta bisa cu cada 3 aña mester tene eleccion. Esaki mester ta un punto di agenda di e congreso anual. E congreso anual ta tuma lugar durante e lunanan di juli pa november. Cual eleccion mester sosode bao di tur miembro. Durante un dia completo miembronan di SEPPA por vota pa eligi nan dirigentenan. E ultimo eleccion tabata durante e congreso Anual di 2013. Pues otro aña ta bay haci 12 aña cu no tabatin eleccion den SEPPA. Un violacion flagrante di statutonan di SEPPA y mas cu tur un postura anti-democratico. Esaki no ta nada otro cu Corrupcion.
Un asunto cu mester tin den tur organisacion democratico, e asina yama “Checks and Balance”, cual ta principionan necesario cu mester existi den un organisacion drechi y democratico. E separacion di poder aki ta necesario, pa e parti ehecutivo di e organisacion no tin demasiado poder den un organisacion pa haci y deshaci. Esta bo tin e parti cu ta ehecuta e trabaonan y e parti cu ta supervisa y controla pa tur cos ta bay correctamente. Despues di un discusion basta larga den congreso di SEPPA for 20.01 pa 20.10, a keda dicidi cu ta pone e sistema di control, Checks and Balance, funciona den SEPPA como un organo apart. Congreso a aproba cu ta bini dos organo den e structura di SEPPA. Uno ta e comite ehecutivo cu su hefe, e secretario General, cual organo mester ehecuta e trabaonan sindical y financiero.
Un otro organo cu ta e directiva cu su presidente, e directiva tin e tarea pa supervisa y controla e comite ehecutivo. Un structura moderno y unico den sindicalismo na Aruba.
Violacionnan mahos di reglanan basico cu mester existi den un organisacion Drechi.
Den articulo 19 di statutonan di SEPPA esaki ta poni. Den lid 5, ta scirbi cu directiva ta duna comite Ehecutivo e decharge=OK pa su maneho financiero di e aña anterior.
Den un combersacion cu e presidente di directiva di SEPPA kende a keda eligi den congreso di 2013, e a splicami cu for di 2014 ya directiva no por a funciona mas, dor di mal-intermediacion di Secretario General Magali Brito.
Pues for di 2014 ya no tin e Checks and Balances den SEPPA.
Magali Brito y su grupo den Comite ehecutivo ta dicta tur cos, nan mes ta ehecuta e trabaonan, nan mes ta supervisa y controla tur cos. Pues no tin aprobacion di e maneho financiero, segun e statutonan di SEPPA.
Pues pa miembronan sa, cu tin violacionnan MAHOS di reglanan fundamental den SEPPA. Prome no tin democracia mas, Despues di 2013 no a tene eleccionnan mas, tampoco e Checks and Balance no ta funciona.
Loke ta resalta tambe ta e falta di informacion di Comite Ehecutivo di kico ta pasando den SEPPA, esaki ya pa hopi aña caba.
Awe 10 di december ariba dia Internacional contra Corrupcion, ta bon pa miembronan di SEPPA, specialmente e delegadonan pensa un rato y yega na e conclusion cu SEPPA no tin democracia, ta viola statutonan dor di no tene eleccion, tampoco ta existi e Checks and Balance. Esakinan ta corrupcion y mester wordo elimina, NO POR.
Nos sa cu Secretario General Magali Brito ta bay defende su mes cu su silencio y ta bisa su hendenan mas cerca “ I don’t give a damn” y ta sigui cu su maneho.
Banco Interbank.
Mi a scirbi hopi e ultimo 15 pa 20 añanan ariba 10 december, ariba kico a pasa cu Interbank.
E banco tabata di un famia poderoso y dor di malmaneho a bay di malo pa pio. Mientras Banco Centrol cu su LTK (Landverordening Toezicht Kredietwezen) mester a controla y supervisa e Banco, pero aparentemente tabatin un falta di control y supervision y e banco lo a bati bancarota.
Segun informacion, despues di intermediacion di Banco Central y Gobierno na 1999, Gobierno a cumpra e banco pa un florin=1 AWG. E prijs di un florin tabata mustra algo incorrecto, pero pa pueblo tuma e responsabilidad over. Gobierno a pasa e banco pa FCCA, pero nan no tabatin e experiencia pa dirigi un banco y mester a bende e banco.
Normalmente ora bo bende algo bo ta ricibi placa pa e producto cu bo a bende, pero den e caso aki ta FCCA mester a paga e banco cu a Cumpra Interbank AWG 55.000.000, 55 miyon floro. Otro cos hopi raro. A nace hopi pregunta kico a pasa?
Pero tur esnan envolvi a keda keto, manera Mike Eman na 1999, consehero huridico di Conseho di Ministro, Marisol Tromp ministro encarga cu FCCA, momento cu a bende FCCA cu un banco local y Parlamentario Mansur te cu 250106, kende a declara como descendiente di e famia poderoso, a bira multimiyonario na edad hoben via regalo di famia.
E dolor y tristo ta cu e pobernan di nos sociedad cu ta hur cas di pueblo y/o tin hipoteca na FCCA, ta nan mester a paga bek 3 biaha e 55 miyon florin cu a wordo presta. Pesey mi a yama e asunto aki ultimo tempo, “Dealnan di Smoeltje Dicht”.
Mi tambe ta cera e capitulo aki, pasobra ta dificil pa kibra e Smoeltjes Dicht.
Gregorio Wolff
