Recien tabatin un interesante caso di tiramento den Corte di Husticia. Ta trata di un caso di un transaccion di droga cu a bay robez y tabatin tiramento y un hende a resulta herida. E sospechoso Z.T. ta para riba cu e no a tira.
SOLO DI PUEBLO a compronde cu Hues a ordena pa laga Instituto Forence na Hulanda, haci investigacion riba e arma pa mira si tin DNA di e sospechoso. Tambe Hues a ordena cu e kier scucha e victima di tiro, E. como testigo.
TIRAMENTO
Recien Ministerio Publico a cuminsa un caso penal contra e homber Hulandes Z.T. (20), caminda ta acusa Z.T. di a purba mata e homber E. riba 9 Mei 2024. Fiscal ta acusa Z.T. di a tira E. Tambe Fiscal ta acusa Z.T. di posecion di un revolver.
SOSPECHOSO TA NENGA
Hues a puntra Z.T., si el a tira riba e homber E. El a desmenti. Hues a bisa cu na Polis Z.T. a declara cu ta E., a dirigi arma riba dje y los tiro riba Z.T. su auto. Segun Z.T., el a bringa cu E. y durante e bringamento, E. a herida su mes cu e arma. Z.T. a desmenti di a mishi cu e revolver.
MESTER MAS INVESTIGACION
Hues a bisa cu loke Z.T. ta declara, ta un scenario completamente diferente cu loke e victima E. ta declara.
Hues a bisa cu por tin DNA riba e arma. E ta haya cu lo ta bon pa laga haci investigacion Forence na Hulanda pa determina sigur si Z.T. a mishi cu e arma of no. Hues tambe ta haya cu mester interoga E. atrobe. Hues a bisa cu Z.T. y E. a bringa cu otro y mester saca afor kende tabatin e arma den su man.
Tambe Hues a remarca cu el a ripara for di e procesverbaal di Polis, cu E. a bisa cu diripiente hendenan a drenta su auto. Tin hende a bisa cu E. lo tabata bende droga. Hues a bisa cu no tin indicacion cu Z.T. tabatin un arma. E ta haya cu mester haci mas investigacion den e caso.
SCUCHA VICTIMA COMO TESTIGO
Hues a bisa cu e kier scucha e victima E. como testigo y e kier e raport di NFI.
Fiscal a bisa Hues cu e ta compronde e importancia di e raport di NFI pa haya claridad kende a mishi cu e arma. Fiscal a sigui bisa cu e tambe ta bou di e impresion cu E. no a papia tur cos. Fiscal ta haya cu E., no a papia di lo tabata bende droga.
Abogadonan di Z.T. a bisa Hues cu nan tambe ta di acuerdo pa pospone e caso pa mas investigacion. Nan no tin nada contra pa scucha E. como testigo. E abogadonan tambe ta di acuerdo pa pospone e caso pa mas investigacion.
ABOGADONAN KIER PA SOSPECHOSO BAY LIBER
E abogadonan a pidi Hues pa laga Z.T. liber pendiente di tratamento di e caso.
Fiscal a reacciona cu e homber F. cu tabata den e auto, a bisa cu Z.T. tabatin un arma y den transaccion di droga, Z.T. a tira E. y a herid’e. Fiscal ta haya cu aki por papia di intento mata. E ta haya e interes di e caso penal ta pisa mas cu e interes di Z.T. Fiscal no ta haya cu mester laga Z.T. liber.
HUES NO A LAGA SOSPECHOSO LIBER
Hues a bisa cu ainda tin motibo di peso den e caso y e no ta haya cu por laga Z.T. liber. Hues a rechaza peticion di abogadonan.
Hues a pospone tratamento di e caso pa dia 28 Maart 2025 pa 8.30 di mainta.
