Diabierna mainta Corte di Husticia a trata e caso penal cu Minsiterio Publico a cuminsa contra e homber C. (42), kende ta wordo acusa di a menaza su mama cu morto y cu e lo kima e cas. Den sala di Corte tabata presente e mama P.
SOLO DI PUEBLO por a compronde cu tanto Hues como Fiscal a keda asombra cu un homber grandi ta bay menaza su mama cu morto y cu lo kima e cas. Ta asina cu e mama a bisa Hues cu e no kier mas pa su yiu bin su cas.
E homber C. a bin acompaña cu un pastor di Centro Alianza, caminda C. ta rehabilita.
Fiscal a bisa cu e acusacion contra C. ta cu riba 23 December 2023, C. a menaza su mama P. cu morto y cu e ta cende e cas na candela.
HOMBER TA MENAZA SU MAMA
Hues a bisa C., cu e tin hopi aña tratando casonan penal y e ta hopi asombra cu e caso aki. Hues no por compronde cu C. ta bay asina leu di menaza su propio mama cu e lo kima e cas y mat’e. Hues a mustra cu na Polis C. a bisa cu el a bisa esey pero no kiermen cu e lo haci’e. Hues a remarca cu e expresionnan aki ta spanta e mama. Hues a puntra, con C. a yega asina leu. C. a bisa cu e tabata biba cu su pareha pero e pareha a bay lag’e y esaki a afect’e asina hopi cu el a bay bebe. E bebemento a pone cu el a bira asina contra su mama.
C. a bisa cu actualmente e ta na Centro Alianza pa rehabilita pa uso di alcohol. El a bisa cu e ta recuperando satisfactorio. El a bisa cu e ta stima su mama hopi y awor e ta realiza cu el a haci malo. El a bisa Hues cu e tin contacto cu su mama y a pidi su mama pordon.
MAMA NO KIER YIU MAS DEN CAS
Hues a puntra e mama con e situacion ta. E mama a bisa Hues cu asina C. bebe, e ta bira problematico. E mama a bisa cu e kier pa un psychiater atende su yiu. El a bisa tambe cu e no kier pa C. bay serca dje mas. El a pidi Hues si por haya un manera cu C. lo por haya un cas.
Hues a mustra cu tabatin un “Tom zitting” caminda a keda palabra cu C. mester bay curso di regulacion di agresion pero cu segun Reclasering, C. no a haci nada. Segun C., el a paga via on line dos biaha y cu Reclasering a bisa cu e mester warda. El a bisa Hues cu dos biaha el a bay personal na Reclasering pero nada.
Fiscal a remarca cu segun documentonan di Ministerio Publico, dia 22 October 2024, C. a bolbe menaza su mama. C. a bisa Hues cu riba indicacion di Reclasering el a bay Centro Alianza.
FISCAL A EXIGI CASTIGO COMBINA
Fiscal a bisa cu e tambe ta asombra cu C. ta menaza su mama. Fiscal a mustra cu Polis a bay na e cas y a mira cu den e cas tabata hopi reboltea. Na opinion di Fiscal, por mira cu aki tin problema cu uso di alcohol. Fiscal a exigi 30 ora di trabao pa comunidad of 60 dia sera. Esaki ta condicional cu 2 aña di prueba. Fiscal a exigi pa den e periodo di prueba, C. keda bou guia di Reclasering pa entre otro e curso di control di agresion.
SENTENCIA
Hues a sera tratamento di e caso y a dicta sentencia di biaha. E opinion di Hues ta cu e centro di tur e asunto aki ta e bebemento. Hues a bisa cu e menaza di mama ta un asunto serio. Hues a bisa C. cu no ta bunita di scucha cu C. a bolbe menaza su mama. Di otro banda, Hues a bisa cu ta bunita pa tende cu C. ta na un centro pa rehabilita. Hues ta haya cu ta bon pa C. cay bou guia di Reclasering. Hues ta haya e exigencia di Fiscal na su lugar. Hues a condena C. na 38 ora di trabao, di cual 30 ora ta condicional cu 2 aña di prueba. E periodo di prueba, C, mester cay bao guia di Reclasering. Hues a splica cu e sentencia ta mas abao cu loke Fiscal a exigi pasobra Hues a kita e 4 dianan cu C. tabata sera, for di e 38 ora di trabao y pesey el a bira 30 ora.
