E curason ta mas engañoso cu tur cos cos,e ta totalmente corupto, ken por compronde? ( Jeremias 17:9).
No ta tur hende cu bisa Mi Señor, Señor lo drenta e reino di cielo,ma esun cu haci e boluntad di mi Tata cu ta den cielo.( Mateo 7:21).
E peliger ta grandi ora cu nos curason no ta completamente dedica na Dios, ora nos ta cana den dos caminda, ora nos ta papia un cos y nos curason ta desea otro cos, pesey nos mester para firme den Señor pa nos curason ta cu Señor tur momento pasobra Dios ta wak curason e no ta wak cara.
Tene cuenta cu tur sorto di maldad cu hende ta haci e ta sali for di nan curason, pasobra tin biaha hende ta presenta algo cu ta parce bon, pero tras di dje e enemigo ta bailando, pasobra diabel tambe conoce curason y debilidad di hende.
Tur locual ta mal pensamento, malicia, adulterio, crimen, orguyo , amargura, palabra sushi, ta sali for di paden for di curason di hende, for di curason di hende ta sali mal deseo, deseo di impuresa, deseo di traicion,deseo di matamento,deseo di destruccion y caida pa otro tur esey ta sali for di curason di hende.Pesey nos curason mester ta dedica y guia door di Dios.
Ta for di curason ta sali envidia Spiritual, pasobra caminda e enemigo haña un porta habri den nos bida eynan e ta drenta, y nos tur mester ta sabi pa sera e porta di nos curason pa e diabel.
Pa mantene e porta sera , nos mester tin comunion constante cu Dios(Daniel capitulo 6). Pasobra sin un comunion constante nos ta corre peliger di wordo contamina.
Nos mester tene bon cuenta kico nos ta scucha, tende , lesa y mira, y hasta ken ta nos amisyad y consehero, pasobra e peliger cu nos curason ta wordo ataca, desvia for di e caminda berdadero di Dios tur dia ta presenta.
Pa un hende haci malo cu otro su curason mester tin maldad den dje, pasobra maldad ta wordo planea den nos curason.
Awendia nos ta mira cuanto odio y vengansa hende tin pa nan mes prohimo, cuanto falta di pordon ta reina, y nos tin cu compronde cu tras di cada curason cu no kier pordona di henter nan curason, ta un curason cu mester di Dios, urgentemente, pa e confesa y wordo pordona, y asina Dios mes lo haci husticia pe.
Pablo ta scirbi den 2 Timioteo 3:1-5 tocante temponan trabahoso, y e ta meciona cla pa nos tur por lesa e tipo di hende cu nos lo confronta cu ne den e tempo peligroso cu nos ta bibando.
Y si nos wak bon, e palabra ta mustra claramente curason aleha for di Dios, cu ta busca nan propio interes, curason cu no kier reconcilia cu Dios, curason sin dominio propio, curason cu no kier pordona, y hasta na final e ta papia di curason di hende cu ta haci manera nan ta cu Dios pero nan curason ta leu for di Dios.
Nos ta bibando den un tempo cu tin hopi imitacion, caminda hende ta desea di imita hende, y ta lubida cu nos mester imita Cristo Hesus, pasobra e palabra di Dios ta bisa cu laga nos tin den nos e actitud cu tabatin den Cristo Hesus.( Filipensenan 2:5).
Ta tempo pa warda nos curason pa Dios, evita tur combersacion negativo cu no ta produci nada bon, evita redo y envidia y mas cu tur cos laga nos pordona manera Dios mes a pordona nos.
Sinceramente, Pastor Marcel Balootje
