Ta dificil pone full nos confiansa den hende, sabiendo cu tur nos confiansa mester ta deposita den Dios.
Pasobra e palabra di Dios ta bisa nos hopi cla: Lo Bo warda den pas perfecto, esun cu su pensamento ta parmenace den Bo, pasobra e ta confia den Bo.
Confia den Señor pa semper, pasobra den Dios e Señor nos tin un Baranca eterno.( Isaias 26:3-4).
Pero tambe cu palabra hopi fuerte Señor ta rechasa esnan cu ta pone nan confiansa den hende y den material, y asina aleha for di Dios: Asina Señor ta bisa: Maldiciona ta esun cu ta confia den hende y ta haci carni su fortalesa y kende su curason ta aleha for di Señor. ( Jeremias 17:5-6).
Bendiciona ta e hende cu ta confia den Señor y kende su confiansa ta den Señor( Jeremias 17:7-8).
Hopi hende ta pone nan confiansa den hende y den material, y no ta buscando direccion, tampoco conseho di Dios, nan ta confia den nan propio sabiduria,nan no ta inclui Dios den nan programma, pero toch nan kier tin exito.
Hopi hende ta confia den astrologia, idolatria y bruheria, y tur tipo di meditacion cu no tin nada di haber cu Dios, y for di tipo di basenan asina nan kier saca bon solucion pa nan bida.
Tene cuenta cu tur bon consehero mester tin conocemento di e palabra di Dios, y no solamente conocemento material, den cual orguyo, arogancia, malicia y falta di pordon ta scondi.
E conseho di Dios ta duradero, pero e tin un preis pa asina e por wordo alcansa, y esey ta e preis di Humildad, caminda rudia ta wordo dobla, caminda Dios su nomber ta wordo invoca, caminda hende ta reconoce ken ta Dios, y kico Dios por haci pa nan, y e ora ey Su misericordia y Su gracia lo abunda riba tur cos y duna solucion pa tur cos.
Pero mientras cu hende ta keda para riba nan propio principio y sin respeta e principio nan di Dios, tur cos ta keda pega y lo no tin salida, te ora hende reconoce cu poder ta di Dios.
Den e buki di Isaias capitulo 37 y 38 Rey Ezekias mester a reconoce tanto den tempo di guerra y malesa cu e mester acudi serca Dios pa e solucion den tur humildad, y Dios a scucha y Dios a yude milagrosamente.
Si bo mester di yudansa di Dios, bo no por pone condicion pa Dios, sino acepta e condicion di Dios den bo situacion:
Na prome lugar sea obediente,
Na di dos lugar somete bo mes na e palabra di Dios,
Na di tres lugar acepta sin duda ningun momento cu Dios ta Soberano y e lo dirigi bo den e mihor caminda, y por fabor den ningun circumstancia no depende riba bo propio forsa ma depende riba Dios.
Dios ta nos refugio,y fortaleza, un pronto auxilio den tempo di angustia.
Pesey nos lo no tin miedo, maske tera kita for di su lugar, y maske sero nan slip bay den curason di laman, maske su awanan ronca y scuma, maske e swerunan tembla door di su furia. ( Salmo 46:1-3).
Lo mi bisa Señor, Mi refugio y mi forti , mi Dios den kede mi ta confia.( Salmo 91:2)
Confia den dj’E tur tempo,O pueblo, drama boso curason Su dilanti,Dios ta un refugio pa nos/( Salmo 63:8).
No lubida esaki cu Señor a duna nos autoridad pa trapa riba colebra y scorpion y nada lo haci nos daño.(Lucas 10:19).
Señor ta nos refugio y nos fortalesa.
Sinceramente Pastor Marcel Balootje
