E ta nos mihor amigo, den Cristo Hesus, nos tin amor, nos tin fieldad, nos tin libertad, nos tin sanacion, nos tin liberacion, nos bida eterna, E ta kita tur cansancio, E ta kita tur preocupacion, E ta nos baranca Eterno, e ta nos defensor y abogado, den Cristo nos tin tur refugio, Cristo Hesus semper ta na tempo, Cristo Hesus ta atende nos tur momento, Cristo Hesus ta e amigo mas serca cu un ruman, E ta nos Redentor.
Esun cu no tin amistad cu Cristo Hesus, tin un bida sin amistad, y lo no conoce amistad berdadero, pasobra mihor amigo cu Cristo Hesus no tin, E a bisa : Bin serca mi tur cu ta cansa carga y lo Mi duna boso sosiego.No tin ningun amigo cu por ofrece esey na nos.
E a entrega su bida, pa nos salbacion, no tin ningun hende na mundo cu por haci esey pa nos.
Ta pa motibo cu Cristo a entrega su bida , awe nos tin pordon di pica, Ta solamente den su nomber nos tin autoridad riba maldad, pasobra ora nos menciona Su nomber e malbado tin cu para leu.
Tin hopi ta kere den religion, pero e goso di mas grandi ta ora nos tin un amistad, un bon relacion cu Cristo Hesus, pasobra riba Cristo nos por depende tur momento.
No tin mas tristo ora hende rechasa Cristo pasobra e ora ey si di berdad nos ta lomba contra muraya pasobra Cristo Hesus ta e unico opcion pa nos salbacion.
Riba e mundu aki hende por tin tur cos, placa, rikesa y hopi propiedad, pero si e persona no tin Cristo Hesus su bida ta bashi.Pasobra ora Cristo Hesus drenta den bo bida, bo ta sinja conoce balor di bida.
Sin Cristo Hesus nos ta djis biba pa biba, pero ora nos tin Cristo den nos bida, nos ta conoce e berdadero amor den bida.
Cristo ta lanta nos tur y pone nos den e caminda berdadero, paso E ta e berdad, y e bida, ningun hende no por yega serca e Tata sino ta pa medio di Cristo Hesus.
Pesey e palabra di Dios ta sinja nos cu nada no por separa nos for di e amor di Cristo Hesus, mas ainda tur hende mester reconoce cu Cristo ta e mata di bida, pasobra pega na dj’E nos por tur cos, leu for di Cristo nos no por haci nada.
Si bo mester confia un persona, awel confia den e homber cu yama Cristo Hesus di Nazaret, E ta esun cu por librabo, tur momento, E ta esun den cual no tin ni sombra di scuridad, pasobra E ta e lus di mundo.
Tur hende cu kier cana den lus, mester cana cu Cristo Hesus pasobra E ta e lus, tur otro lus por paga, pasobra nan ta depende di man di hende, pero ora bo ta cana den e Lus di Cristo Hesus semper lo bo tin lus.
Esaki ta Mi mandamento, cu boso stima otro mescos cu Ami a stima boso. Ningun hende no tin amor mas grandi cu esaki,cu un hende cu ta duna su bida pa su amigonan.( Juan 15:12-13).
Pesey e palabra ta sinja nos den Santiago 4:7 cu amistad cu mundo ta enemistad cu Dios, pasobra e amor di Cristo nunca por wordo compara cu e sistema di mundo.
E mundo ta ofrece inmoralidad, Cristo Hesus ta hiba nos na Santidad, ta solamente pa medio di Cristo Hesus nos por alcansa bida terna.
Tuma bo tempo awe,y balora E amistad di Cristo.pasobra E ta fiel.
Sinceramente, Pastor Marcel Balootje
