Señora Carla Paris-Arends a bira miembro di Women’s Club of Aruba (WCA) na 1980. Despues di a sirbi comunidad di Aruba boluntariamente pa 40 aña, WCA a duna Carla reconocemento y na 2020 el a ricibi e status di Life Member.
Carla tabata semper un miembro estricto y cu hopi bon argumento na bienestar di su Club stima. Su profesion di docente tabata pa instrui esnan rond di dje pa por traha segun reglanan sea di trabao of servicio na bienestar di nos comunidad, y te hasta den gobernacion. P’esey mes Carla a ofrece pa duna lesnan di Procedementonan Parlamentario (Parliamentary Procedures) na otro miembronan di WCA.
Carla a traha riba nos Constitucion & Statuto (Constitution & Bylaws / C&B) pa WCA por a keda inscribi na KvK na 2007. Ta pa e motibo aki mes cu a keda acerca Carla pa su opinion te na ultimo, pa si tin duda riba enterpretacion di cualkier parti di nos statutonan. Carla semper tabata dispuesto pa yuda unda cu e tabata por. Esaki tabata mustra su amor grandi pa nos Club sin kit’afo si, cu e por tira bo cu e C&B ora cu bo no tabata pone atencion na su recomendacion. Carla tambe por tabata masha bon den duna curashi pa efectua cualkier proyecto y sa di duna bo ‘een klop op je schouder’ pa un bon resultado.
Carla a sirbi WCA como presidente na aña 2002-2003 y a haci esaki eficientemente cu su miembronan di directiva. Esnan cu traha cu ne den directiva a keda impresiona cu su maneho. Carla lo keda semper recorda positivamente y su añanan di servicio lo ta bay ta visibel den e Historia di WCA, cu pronto ta obtenibel publicamente na Biblioteca Nacional.
E trayectoria di Carla den WCA ta manera ta sigui:
1986-1987 Tesorera y miembro di comision di Student Awards.
2000-2001 Tesorera y editor di nos boletin mensual
2001-2002 Secretaria di corespondencia y editor di nos boletin mensual
2002-2003 Presidente di WCA
2003-2005 Ex Presidente y advisor parlamentario
2007-2008 Tesorera y Chairman comision di Statuto
2008-2009 Chairman di comision di Statuto
Fuera di tur esaki, Carla tabata yuda den varios comision pa cu nos proyectonan.
Pa nos di WCA, Carla tabata un miembro ehemplar y sigur inolvidabel pa esnan cu a conoce y cu a traha cu ne. Su conocemento di diferente materia mundial, social, financiero y gubernamental tabata representa den su biblioteca personal cu ta masha impresionante. Y cu su inteligencia, e tabata dispuesto pa comparti cu nos tur, pa nos por a hiba WCA dilanti y produci proyectonan masha exitoso mes. Cu tristesa na nos curason, nos ta bisa Carla, AYO te despues.
Danki Carla, pa tur locual bo a contribui na club y comunidad!
Na nomber di directiva y tur miembro di Women’s Club of Aruba, condolencia na su yiunan, su rumannan y demas famia. Hopi forsa pa por pasa den e tempo di tristesa y falta di Carla!
