Algo masha bunita ora ta existi amistad, amor y confiansa entre mayor y yiu.
Semper y cuando cu e tin su limite, pasobra e den e amistad ey semper mester keda existi respet di un pa otro.
Aunke ta existi amistad , e mayor semper mester mantene e autoridad di disiplina y coregi su yiu.
Y e yiu semper mester keda honra su tata y su mama.(Efesionan 6:1-4).
E bida di e mayor semper mester ta un testimonio bibo pa e yiu por imita den desencia, sabiduria, y mas cu tur cos den moral , integridad, y etica
E mayor nunca mester probecha di e yiu su inocencia,ni tampoco e yiu mester probecha di su mayor su bon curason, semper mester tin un balans , mescos cu den nos bida cu Dios tin un amistad, balansa , pasobra riba tur cos Dios ta keda Dios den nos bida y nos no por trata Dios con cu ta.
Tur mayor mester compronde cu nan ta e modelo di bida pa nan yiu, y cu nan yiu ta stima nan y ta wak riba nan.
Tur mayor mester compronde cu nan yiu tin un nivel halto di confiansa den nan, y ora e confiansa aki wordo traiciona e ta causa hopi dolor serca e yiu.
Pasobra nos yuinan ta regalo di Dios ( Salmo 127), y ta pesey nos deber como mayor ta di brinda nan amor, sinceridad, proteccion, disiplina y coreccion.
E curason di e mayor especialmente e tata mester ta un curason dirigi pa haci bon na su yiu, den tur caso e tata mester pordona su yiu, mescos cu Tata den cielo ta pordona nos.
E yiu cu ta cay den gara di e diabel, semper mester tin e seguridad, cu si bay bek serca su tata, e ta ricibi pordon di su tata y su bida ta wordo restaura( Lucas 15;11-32), pasobra pordon di mayor tin efecto riba bida di tur yiu.
Ora un mayor pordona su yiu , e pas di Dios ta bolbe den e yiu su curason, e garantia pa crecemento ta aumenta, pasobra una bes un yiu ta bon cu su mayornan, su bida ta cambia.
Nunca laga bo yiu sinti su mes bandona, pasobra ora e relacion entre abo cu ta su mayor y yiu ta kibra, aleha y no tin forma pa drecha, semper e mayor mester busca un forma pa aserca yiu, y e yiu tambe mester aserca cas, pa demostra cu e ta corda for di unda e a sali, y cu cas semper ta mihor.
Ta masha tristo ora un mayor sera porta di cas pa su yiu, y bise bay for di aki, y nunca mas, drenta e cas aki, pasobra eynan bo ta expone bo yiu, na tur atake diabolico, pasobra rechaso especialmente di mayor pa yiu, ta duna diabel forsa, y e porta di scuridad ta habri.
Corda bon cu nos no mester duna satanas bentaha , pasobra nos no por ignora su plannan. Corda bon cu e diabel tey solamente, pa horta mata y destrui y e no conoce misericordia.
Cual ta e ehempel cu un mayor ta duna, ora e mes ta bisti indecente,ora e mes ta burachi, e mes ta droga, y e mes ta sinja su yiunan bebe.
Laga tur mayor realisa cu ta un mandato di Dios, pa stima y lanta nan yiunan den e caminda di Dios,pa bon di e mucha mes, y pa Dios ricibi tur e Gloria.
E amistad entre mayor y yiu ta di gran balor, pa bida di yiu, pa famia y pa comunidad.
Sinceramente Pastor Marcel Balootje
