Autoridad a captura un homber di 40 aña na aeropuerto Rafael Núñez na Cartagena, Colombia cu un “peluca di droga”. E homber aki tabatin 19 capsula di cocaína scondí den su peluca y tabata purba di transporta e droga pa Amsterdam, capital di Hulanda.
Despues di un Prueba di Identificacion Preliminar Homologo (PIPH) positivo, e agentenan di Polis Nacional antinarcotico a confisca e substancianan aki y a descubri cu e homber tabatin un total di 400 dosis di cocaina scondi den su peluca, balora na mas di 10.000 euro.
Comandante di Polis Metropolitano di Cartagena, Gelver Yecid Peña Araque, a declara cu e homber a wordu descubri pa un grupo di experto cu a nota algo straño ora el a pasa door di e scanner di aeropuerto.
“Nos ta dunando golpi fuerte contra e structuranan criminal aki cu no solamente ta bringa pa e trafico local di substancia ilegal, pero tambe ta genera diferente acto violento y otro tipo di delito cu ta stroba trankilidad y convivencia,” e polis a bisa.
Awo, e detenido ta den man di Fiscalia General di e Nacion y ta acusa pa cargonan di trafico, fabricacion y posesion di substancia ilegal, un delito pa cual e tabatin antecedente caba.
Segun informe di Nacionnan Uni, produccion di cocaína na Colombia a subi cu 53% den 2023, alcansando un record historico di 2.600 ton. Colombia t’e productor mas grandi di cocaina na mundo, segun ONU, y den su informe anual, e organisacion a registra e cifra mas halto di plantacion di blachi di coca (253.000 hectar, 10% mas cu na 2022).
