Asina e Senjor Dios ta bisa: No recorda e cosnan di antes, ni keda pensa riba cosnan cu a pasa caba. Mira mi ta bay haci algo nobo, awor esaki ta bay sali na cla, boso no ta ripara esey? Lo Mi traha un caretera den tera seco, riunan den dan desierto.(Isaias 43:18-19).
E enemigo ta bini solamente pa horta , pa mata y pa destrui, y tur caminda cu e hanja un porta habri e ta sembra pleito , odio y division.
E ta busca tur manera pa cohe tur locual ta rebeldia, y causa stress, depresion, amargura,trauma, morto spiritual y fisico cune, y hende no ta ripara esey.
Hopi biaha locual hende ta bisa awe no ta “nada” ta cos di mucha , mayan cu Dios kier ta bira algo, cu ta trece tristesa y cu hende ta hanja nan mes ta bay bishita nan yiu na prison, pa motibo di cosnan cu a neglisha y laga bay for di man.
No tin nada mas doloroso ora cu un persona ta cana rond herida, pasobra su herida ta pone actua, robes, pensando cu hende ta papia riba dje tur caminda cu e bay, y asina bira victima di tur locual hende por papia.
Ta facil pa un hende asina cay den un pleito y discucion, y asina bira malo, pasobra e tin heridanan den su curason cu no a wordo sanea,y cu cualkier cos dolor ta lanta, presion ta subi, y dolor di cabes no kier stop.
Pero ta momento pa entrega e carga ey na Cristo Hesus, pasobra diabel tin hopi hende ganja cu nan por lanta ariba pa medio di alcohol y droga, cu ora nan dal un bitter, of usa droga tur cos ta wordo lubida, of ora nan ta den un gran fiesta, manera esun di awor aki cual ta carnaval, tur problema ta wordo kita, cu baile , cu goso, cu perversidad y inmoralidad, caba ora tur bagamunderia pasa, e dolornan ta bini bek, pasobra scuridad y paranda nunca por sana ningun herida.
Cristo Hesus a bisa : Bin serca Mi tur cu ta cansa y carga y lo Mi duna boso sosiego.( Mateo 11:28).
E no a bisa bay serca ningun bruho, ni tampoco esnan cu ta usa su nomber pa ganja hende, pero E a bisa pa bini direct serca dje, pasobra E ta manso y humilde di curason, y boso lo hanja sosiego pa boso alma.( Mateo 11:28-29).
Tin hopi hende herida, ta cana rond y laga hende ranca placa bestialmente for di nan, enbes di entrega nan carga na Cristo. Tin hopi probechador ta kita placa for di hende sabiendo masha bon cu nan no por yuda cu nada, pasobra e persona ey ta Dios e mester den su bida.
Bendiciona sea e Dios y Tata di nos Senjor Hesus Cristo, e Tata di misericordia,y Dios di tur consuelo. Kende ta consola nos den tur nos aflicion, pa asina nos tambe, por consola esnan cu ta den cualkier afliccion, cu e mesun consuelo cu Dios a consola nos cune.( 2 Corintionan 1:3-5).
No busca consuelo den rabia , odio, of vengansa, no busca consuelo den opinion di hende cu no conoce amor di Dios , y cu hopi biaha nan mes ta herida, pasobra nan a rechasa e consuelo di Dios, cual ta su Yiu stima Hesus Cristo.
No tene miedo, pasobra Mi ta cu bo, No desmaya pasobra Mi ta bo Dios. Lo Mi fortalese bo,si lo Mi yuda bo, si lo mi sostenebo cu Mi man drechi di husticia. (Isaias 43;10).
Sinceramente, Pastor Marcel Balootje
