Si nos tene bon cuenta cu henter nos sistema di orden y seguridad a wordo basa y establece segun e palabra di Dios cu ta para scirbi den Romanonan 13:1-6 .
Nos mester tene cuenta cu liderazgo di nos pais tambe mester por wordo basa y establese segun 1 Timoteo 3:1-13.
Pasobra tur liderazgo mester ta firme tanto dilanti di Dios, como dilanti di hende, pa asina rtespet por reina tur caminda y no lubida cu integridad ta bini di Dios, pasobra Dios ta esun cu ta mantene nos integridad, placa, ni estudio no ta representa integridad.
Den 1 Timoteo 3 : 1-6 ta para scirbi cu bo ta aspira di ta un lider spiritual sea un pastor, apostol, evangelista, profeta, maestro di palabra, anciano di iglesia ta algo bon bo ta desea, ta un bon trabao bo ta desea di haci.
Awor ta posibel pa nos por aplica esey pa nos Parlamentario y Minister, pa asina halsa nos nivel di gobernacion na top, pa ningun hende no tin mester di mustra dede, pasobra liderazgo di un pais ta algo serio y bendiciona.
Laga nos lesa bon locual ta para scirbi, y haci e pregunta cu e mesun condicionnan no por wordo aplica , pasobra hende ta keda hende, y liderazgo mester ta di bon nivel den tur circumstancia.
Un lider mester ta sin reproche, Esposo di un Esposa,modera, prudente,respetabel,un hende cu ta gusta duna posada, cu capacidad pa sinja hende,no mara na binja ( No un burache of un hende cu ta dal drinks tur dia).no violento , sino amabel, no pleitado,liber pa amor di placa.
E mester ta un hende cu ta maneha su mes cas bon,cu ta tene su yuinan bao di control, cu tur dignidad.
E mester tin un bon reputacion. Un lider mester ta un persona digno, kende no ta papia cu dos lenga,ni ta golos pa placa,nan mester wordo proba den esakinan, pa asina nan ta sin reproche.
Un lider mester ta un persona cu henter un comunidad por cohe ehempel for di dje den orden , respet, disiplina, etica y moral.
Pero laga nos pone enfasis, con Bijbel ta hala nos atencion, riba nos matrimonio y famia, ora nos kier ta un lider berdadero y firme den comunidad, tanto den sector priva como den politica.
Ta dificil hiba un liderazgo cheap den algun organisacion of politica y den comercio hiba un liderazgo firme pa no perde negoshi.
Integridad y moralidad mester keda na un nivel halto, no por tin liderazgo con cu ta, pasobra asina e nivel di produccion ta baha.
E nivel di respet den famia, ta un muestra cu na cas cos ta cana bon, pasobra educacion ta cuminsa na cas, y for di cas respet ta sali, y esey ta locual un lider mester ta ,un persona respetuoso.
Un lider mester ta un homber di un solo muher, of un muher di un solo homber, pasobra asina tin tercera persona den e matrimonio , mentira ta drenta, y caminda mentira drenta chaos ta drenta.
Pasobra un hende cu ta capas di ganja su esposa of esposo cu e ta drumi banda di dje tur dia, tambe ta capas, pa acepta y apoya tur clase di bagamunderia, pasobra unabes porta wordo habri pa scuridad, e mentira ta hanja caminda pa biba.
Y ora nos como lider/ mayor ta huisioso nos por exhorta, coregi y disiplina nos yuinan,y e pueblo pa den tur cos nan presenta nan mes como ehempel den bon trabao, cu respet y dignidad.
Liderazgo di un pais, mester ta firme, y asina e poblacion lo bira firme.
Sinceramente, Pastor Marcel Balootje
