E Palabra di Dios ta bisa: Cu si bo confesa cu bo boca, Hesus como Senjor , y kere den bo curason cu Dios a lanta Hesus for di e mortonan , lo bo ta salba,pasobra cu curason hende ta kere pa hanja husticia, y cu boca e ta confesa pa hanja salbacion.( Romanonan 10: 9-10).
For di curason di hende ta sali cos bon, cos malo, cos bunita, cos mahoso, perversidad, y inmoralidad, ladronicia y crimen , amor berdadero y adulterio, odio y violencia, pleito y bringamento.
Cosnan cu hende ta haci ta den nan curason e ta biba, pasobra tur tipo di deseo ta biba den hende su curason, no ta ningun hende a forsa otro pa haci nada bulgar, ta e curason cu ta desea di haci cosnan bulgar y e curason cu te ainda tin perversidad den dje ta duna su demostracion.
Pesey e Palabra di Dios ta bisa cu riba tur cos , nos mester warda nos curason,
Pica ta wordo forma den mente y curason, pasobra tur locual un hende haci ta wordo forma den su curason, pesey hopi biaha nan ta bisa cu hende burachi ta papia nan mente y nan curason, bisando cosnan cu hopi tempo nan tin gana di bisa, pero tabatin mester di un tiki curashi di alcohol, pa por expresa e sentimento cu tin den nan curason. Y hopi biaha na un forma hopi robes.
No ganja bo mes tur locual bo a haci ayera a sali for di bo curason, pasobra tabata bo deseo di hacie y porta awe bo ta sinti berguensa, awe bo tin duele, awe bo ta yora, bo desencia y e placa cu a wordo gasta, na panja, y alcohol, y despues mas laat gasto na e warda di polis pasobra despues di baila, bebe, canta y bringa, bo a wordo deteni.
E cosnan aki tur por a wordo preveni, ora e curason ta dedica na Dios, ora Cristo Hesus, tin berdaderamente e prome lugar den bo curason, pasobra Cristo Hesus tin e poder di saca scuridad for di den curason di hende.
Dios ta lus y den dj’E no tin nada, nada di scuridad. Pero tene cuenta cu bo actitud ta sinta den bo curason, y caminda tin scuridad den curason di hende tur sorto di malisia y bagamunderia por tuma lugar.
Awendia ora cu coregi un hende ta nifica cu bo a husga e persona, esey ta e defensa cu diabel a hinca den curason di hopi hende, cu aunke nan ta haciendo malo toch ,nan kier evita di tende nan berdad.
Dios a manda Su gran Coreccion aki na mundo pa medio di su Yiu unigenito Cristo Hesus, pa ken cu kere den dje no bay perdi ma hanja bida eterna, Cristo Hesus ta nos Salbacion , y tambe nos gran Coreccion for di e mundo di pica.
Y mientras cu arepentimento berdadero, no alcansa nos bida, nos ta sigi den e saus sushi bieu di bida caminda hende lo mustra dede riba nos sperando di mira un cambio, di bida , di curason, di actitud, cual solamente por sosode cu un entrega total na Cristo Hesus.
Aspira pa tin pas cu tur hende, y santificacion, sin cual ningun hende lo mira Senjor.( Hebreonan 12:14).
Boso no sa cu boso ta e tempel di Dios,y cu e Spirito di Dios ta biba den boso. Si un hende destrui e tempel di Dios, Dios lo destrui e,pasobra e tempel di Dios ta santo, y esey ta loke boso ta.( 1 Corintionan 3:16)
Sinceramente, Pastor Marcel Balootje
