Doctrina sano ta sinja nos cu no tin ningun palabra mas halto cu palabra di Dios, cu palabra di Dios ta riba tur cos, pasobra Dios ta Todopoderoso y donjo di tur cos.
Dios su palabra ta berdad, e ta cura nos, e ta libera nos, y e ta libra nos di tur tentacion, y mas cu tur cos Su Palabra ta salba nos y duna nos bida eterna.
Respet pa nos mes y pa asina otronan por respeta nos, ta un joya den nos bida.
E palabra di Dios ta bisa lo siguiente;
Pesey no permiti pica reina den boso curpa mortal, asina cu boso mester obedece su pasionnan.
Y no sigi presenta e miembronan di boso curpa na pica,como instrumento di inhusticia, ma presenta boso mes na Dios como esnan bibo for di e mortonan y boso miembronan como instrumento di husticia pa Dios. ( Romanonan 6:12-13).
Palabra di Dios ta bisa cu tentacion lo bini pero Ay di esun cu ta causa tentacion y asina pone su yuinan trompica.
Ora un hende ta bon conciente di locual e ta haci y ta hacie pa provoca Dios y su prohimo e hende ey ta haciendo pica.
Dios su Palabra ta bisa cu nos curpa ta tempel di Dios y e Spirito di Dios ta biba den nos. (1 Corintionan 3:16).
Dios su palabra ta bisa: Of boso no sa cu boso curpa ta e tempel di Spirito Santo, Kende ta den boso. Kende boso tin di Dios, y cu boso no ta pertenece na boso mes. Pasobra boso a wordo cumpra pa un preis, pesey glorifica Dios den boso curpa.( 1 Corintionan 6:19-20).
Ora nos ta papia di Moral, nos ta papia di Respet y Balor.
Mundo ta yena cu perversidad, cu inmoralidad,cu tur tipo di bagamunderia sexual y cu abominacion.
Pero nos mester educa nos yuinan cu un moralidad halto pa nan no cay den trampa di diabel y laga scuridad goberna nan bida, pesey nos mester papia cla, duna un educacion limpi y firme na cas, pa evita cu nos yuinan lo trompica, y por ta piedra di trompica pa otro hende.
Nos mester sinja nos yuinan bisti decente;
Ora un hoben ta lanta, e mester lanta cu respet pa su mes y pa e wordo respeta door di otronan.
Laga nos pone hopi cla y raspa:Bistimento sunu ta un bobedad ta un falta di respet pa Dios,pa bo mes y pa otronan.
Bo curpa ta un tesoro, y ningun hende ta pone nan tesoro den bista di tur hende, pa hala atencion di ladron y malbado.
Un cabayero cu ta sali cu su enamorada y e ta bisti sunu, no ta stima e persona, no ta respeta e persona y tampoco ta respeta su mes pasobra e mester bisa e enamorada ( su Chick) bisti na drechi pa hende respeta nos.
Un homber casa cu ta cana cu su esposa cu ta bisti sunu, no ta respeta su esposa, tampoco ta respeta Dios, e ta expone su muher na otro hende, pero mas ainda e muher ta demostra cu e no ta somete su mes na e homber , ni tampoco na Dios, pasobra den tur su bunitesa e ta lubida cu e ta pertenece na su esposo.
Ta tristo mira un mama sali cu un yiu menor di edad indecente of sunu bisti bay supermarket, parce manera nan dos no ta biba hunto..
Tin hende ta asina perverso di bisa otronan mester sera nan wowo.
Pero no lubida cu Dios ta mira tur cos.
Laga nos respeta otro.
Sinceramente, Pastor Marcel Balootje
