A.T.A. ta cuminsa aña cu resultado positivo durante januari 2025: ‘Alabes, ta comparti cifra di patronchi di gasto di carchi VISA durante aña 2024’

A.T.A. ta sigui fortalece e presencia di Aruba na mercado internacional, cu entre otro participacion activo durante feria di turismo ANATO na Colombia y ITB Berlin na Alemaña durante februari y maart 2025. Cu esfuersonan strategico, A.T.A. ta percura pa asegura cu e marca Aruba ta keda atrae interes continuo como un destinacion preferi, mientras ta promove su oferta autentico y sostenibel pa atrae tanto operadornan di biahe y otro socionan clave den e industria turstico.

Durante aña 2024, a conta cu 936.013 VISA cardholder di 153 pais cu a gasta cerka US$638 miyon na Aruba, representando un cresemento di 13.6% den total di benta si compara cu 2023. E aumento aki ta representa un subida di 15% den cantidad di cardholder y un crecemento di 17.6% den volumen di transaccion, mientras cu retiro di cash a yega US$58.4 miyon. Gasto pa cada cardholder a keda practicamente stabil compara cu 2023. Restaurants & Dining ta keda como e categoria principal den gasto cu US$180.7 miyon, y un aumento di 16.5%. Sigui pa Hotels & Lodging cu US$147.8 miyon (+22.1%), y Retail cu US$145.7 miyon (+7.5%). Alabes, a conta cu un crecemento significante den Transportation (+20.8%), Fuel (+19.4%), y Food & Grocery (+18.3%), mientras cu a registra un disminuicuin den gasto pa cu Travel Services (-33.3%) y Professional Services (-14.9%).

ESTADISTICA CONFORME ACTUALISACION DEN E INDUSTRIA DI TURISMO:

VOLUMEN (“STAYOVER”) CU RESULTADO POSITIVO ADICIONAL DI 4.7% DEN JANUARI 2025 COMPARA CU JANUARI 2024

Conforme e demanda por bai mira tambe cu e aerolineanan lo sigui expande capacidad y asina permitiendo nos captura e demanda. Den januari 2025, Aruba a ricibi un total di 124,787 huesped “stayover”, esaki ta un crecemento di 4.7%, si compara cu januari 2024, unda a ricibi 119,194 huesped “stayover”.

MERCADONAN Y CATEGORIANAN DI ACOMODACION

Den januari 2025, 77.9% di e total di e huespednan “stayover” pa Aruba a bishita for di Norte America, 4.4% a bishita for di Europa, 15.5% a bishita for di Latino America y 2.2% tawata procedente di otro partinan di mundo.

Mirando e categorianan di acomodacion, den januari 2025 25.5% di huesped a keda den hotelnan European Plan, 13.8% a keda den hotelnan All-Inclusive, 22.1% a keda den Timeshare, y 38.6% a keda den otro tipo di acomodacion, incluyendo short-term vacation rentals (STVR).

SHORT-TERM VACATION RENTALS (STVR)

A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera. Den 2024, segun un estudio, A.T.A. a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di lugar di estadia cu no ta un hotel pero cu si ta disponibel na e turista cu ta keda na Aruba pa un corto tempo.

Si compara januari 2025 cu januari 2024 por wak cu e ocupacion averahe di e acomodacionan aki a subi cu 5.1 punto di porcentahe, for di un averahe di 68.4% na januari 2024 pa un averahe di 73.5% na januari 2025. 

Den caso di entrada, si compara januari 2024 cu januari 2025 por wak cu e categoria ta conta cu un crecemento di 18.5% den entrada. 

Bishita www.ata.aw tur luna pa A.T.A. ‘Statistical Monthly Report’.