Fe ta poderoso, Fe ta move mannan di Dios, tur cos ta posibel si bo tin Fe.
No ta cos di discuti cu otro hende, ora bo tin fe den Dios, Dios mes lo obra na bo bienestar.
Pasobra si Dios no hacie pa bo ken lo hacie pa bo, ta den Dios solamente bo confiansa por ta, y no biba pa opinion di hende, simplemente deposita full bo confiansa den Dios, pasobra ta agrada Dios ora hende ta confia den dj’E, pasobra Dios ta Todopoderoso.
Ay Senjor, Dios , Mira ta abo a traha cielo y tera pa medio di Bo gran poder, y pa medio di bo brasa extendi,Nada ta muchu dificil pa bo.( Jeremias 32;17).
Mira Ami ta Senjor e Dios di tur carni,acaso tin algo cu ta mucho dificil pa Mi? ( Jeremias 32:27)
Scuridad di mundo, y falta di conocemento hopi biaha ta pone hende duda den e poder di Dios, y hopi tin curason dobbel y no ta para firme riba e palabra di Dios, tambe enemigo hopi biaha ta horta for di hende e berdad di locual Dios ta bisa, causando cu hende ta biba den dobbel animo, y asina bira inconstante den tur su camindanan.
Ma E a bisa e cosnan imposibel pa hende ta posibel pa Dios.(Lucas 18:27).
Hesus a keda waknan y a bisa nan,Serca hende esaki ta imposibel,ma serca Dios tur cos ta posibel.( Mateo 19;26).
Mi sa cu Bo por haci tur cos,y cu ningun di bo propositonan por wordo stroba. ( Job 42;2).
Lo Bo warda den pas perfecto,esun cu su pensamento, ta permanece den Bo, pasobra e ta confia den Bo.Confia den Senjor pa semper,pasobra den Dios e Senjor nos tin e Baranca eterno.( Isaias 26:3-4)
Nos ta bibando den tempo trabahoso, caminda hende ta stima nan mes mas cu Dios, caminda hende ta wak solamente nan interes y no ta tene cuenta cu otro.
Caminda hende a bira asina falso y vengativo, cu nan no ta worry ken wordo perhudica, basta nan gusto y nan placer permanece, basta nan hanja locual cu nan kier, nan ta dispuesto, pa destrui, cas famia y yuinan, bandona tur cos basta nan carni wordo satisface.
Ta duro pa mira con hende por actua cu instinto manera animal, pero tur esey ta sosode ora hende cay en gara di e enemigo, cu ta ciega hende, y nan nota ripara cu e enemigo solamente ta busca destruccion di nan bida.( Juan 10;10).
Pero ora nos tin fe den Dios, cos lo cambia, pasobra Dios ta stima hende humilde, y Dios tur momento lo sali na defensa di hende humilde, humildad ta tur locual Dios kier mira den nos bida, pa nos keda ancra den Cristo y asina cosnan grandi Dios lo haci pa tur esnan cu ta perservera y permanece den su caminda.
Tur bon regalo,y tur don perfecto, ta for di ariba, y ta baha bini for di e Tata di lusnan,serca Kende no tin variacion, ni sombra di cambio.
Ta hopi mentira ta wordo di download den mente di hende tur dia, hopi desconfiansa, hopi desunion, pa asina hende desvia nan Fe for di Dios, hopi informacion contrario na e palabra di Dios ta wordo publica, pesey awor ta e momento di aumenta nos oracion y nos fe den Dios y para firme, pasobra tur cos ta posibel pa esun cu ta kere.
Duda ta enemigo di bendicion, duda ta aleha e presencia di Dios for di nos bida.
Fe ta demostra firmesa, y e firmesa, lo trece gracia y goso den henter nos bida.
Sinceramente, Pastor Marcel Balootje
