Den cuadro di Dia Internacional di Hende Muhe, Partido MEP y Comicion Forsa Femenino Grace a organisa na Cede di MEP un encuentro ameno pa tur nos hende muhenan riba nan dia. E tema e aña aki tabata “For ALL Women and Girls: Rights. Equality. Empowerment.” Den un sala completamente yen y bunita dorna esnan presente por a disfruta di varios presentacionnan balioso dirigi na nos sernan femenino.
Lider di partido MEP Evelyn Wever-Croes a duna un discurso na unda el a enfoca riba lidersago femenino y e importancia pa prepara nos mucha muhenan pa por asumi posicionnan di lidersago den futuro. El a duna hopi ehempelnan personal y a comparti e areanan cu e ta enfoca riba dje pa asina crea un balans den su bida.
Un di e oradornan riba e anochi aki tabata señora Ruthdlene Sanchez cu a papia riba e significado di “Empowering”. Sigur un presentacion hopi inspirativo na unda el a splica riba e realidad cu tin actualmente na Aruba unda hopi biaha nos kier empower otro y alabes kibra otro, y e rol cu social media ta hunga den esaki. Tambe el a reitera cu un muhe empodera no ta uno cu lo purba na caba cu otro of desea malo pa otro sino un muhe cu ta den control di su emocionnan y cu ta sostene otro.
Thalina Willems tambe tabata un orador e anochi aki y a elabora riba e lasonan cu hende muhe ta forma den su crecemento y e impacto cu esaki por tin den e desaroyo como hende muhe y mucha muhe. Señora Willems a enfoca specialmente ariba lasonan sigur y con esakinan por desaroya como adulto tanto riba nos mes cu informacion, pero tambe cu ayudo / guia profesional. Tambe el a brinda informacion di diferente instancianan social cu ta proveë guia y sosten pa e hende muhe y muchanan.
Durante e anochi aki, Stichting HUNTO tambe a duna un presentacion hopi informativo. Señora Michelle Lont a comparti informacion riba e servicio cu Stichting HUNTO ta ofrece, concentrando principalmente riba salud mental. Durante su presentacion, Lont a enfatiza cu hopi hende den comunidad ainda no sa unda nan por busca ayudo pa problema di salud mental. E pregunta “Unda bo ta bai ora bo tin un problema di salud mental?” a crea un dialogo hopi interesante, unda e participante nan a comparti idea y experiencia riba e tema. Na final di e charla, e interes tabata grandi, cu hopi pregunta. Participante nan tambe a pidi pa ricibi mas informacion y tips pa cuida nan bienestar mental.
Lider di partido MEP a expresa cu e encuentro aki manera tur aña tabata uno exitoso, y ta gradici partido MEP, Shannnon Henriquez , Comicion Forsa Femenino Grace, e team completo, tur e orador y participante pa haci esaki posibel.
