Tabata manera un awacero den hospital
Dia 1 di Maart, a sosode un situacion grave na hospital, ora un tubo a kibra na piso 4, causando daño serio na piso 4, 3, 2 y 1. E incidente aki a resulta den un desastre, afectando varios departamento y forzando ciere temporal di algun seccion importante.
Un di e area mas afecta ta piso 2, spesificamente na e seccion di NICU (Neonatal Intensive Care Unit). Debi na e daño, e seccion aki a keda sera te awe, loke ta pone un riesgo grandi pa e yuinan prematuro cu ta naci den hospital.
Causa di e Problema material barata
Segun informacion, e awa den hospital ta wordo getreat cu chloor via un sistema di tratamento mericano. E chloor aparentemente a causa daño na e tubonan, resultando den kiebro di e tuberia.
Lekkage grandi di awa
E tubonan ta di material SDB, un material hopi barata cu no ta resisti e chloor. Enbes di usa koper, nan a usa e material di mas barata, causando debilidad di tuberia y kiebro. Esaki a haci cu awa a basha den hospital manera awacero.
Tin un investigacion tumando lugar. E daño ta hopi serio y ta trece un impacto grandi pa hospital y su pashentnan.
Hospital a confirma e incidente
Hospital di Aruba a confirma cu tabatin un incidente unda un tubo a rementa den toren B, causando lekkage cu a causa impacto riba varios departamento, incluyendo neonatologie.
Segun un vocero di hospital:
“Ta cuadra cu un tubo a rementa y cu tabatin un lekkage den toren B cu tabatin un impacto riba diferente departamento incluyendo neonatologie. Ta cuadra tambe cu mester a sera un paar di kamber pa asina resolve e problema mas lihe cu ta posibel. E team di HOH a traha duro pa asina resolve e problema lo mas lihe cu ta posibel y ya mayoria di departamento ta ‘up & running’. Pa loke ta neonatologie encuestion, lo ta ‘back to normal’ pa diaranson awo.”
Hospital a sigui traha riba e situacion pa asegura cu tur departamento por funcciona normal atrobe den menos tempo posibel.
Loke nos por conclui ta cu e hospital cu a costa 1 biyon florin ( 1000 miyon) a wordo traha cu material fofo y barata. Esaki por splica tambe cu e compania encuestion a haci ganashi barbaro.
Enbes di usa koper a bay over cu material chines barata. Ata un spill a tuma lugar lagando tur piso bao di awa.
Ta duna indicacion tambe cu esnan cu mester controla, kisas no a hasi nan trabao.
Mester puntra por ehempel parlamentario Goeloe, kico e por sa di e materialnan fofo aki? Ya cu segun nos tin entendi, na un momento of otro e tambe tabata maneha hospital via bestuur.
