Matrimonio entre homber y muher ta e unico formula cu Dios a usa riba e mundo aki, pa multiplicacion di hende, pa asina mundo por wordo yena cu ser humano.
Tur ser humano a nace for di un homber y un muher esey ta un berdad cu tur hende mester acepta, y no hunga wise, pasobra ningun hende na mundo no por cambia nada, cu Dios a establece.
Mundo ta yena cu copia , pasobra diabel gusta copia, e ta master den disfras, e ta pone koper lombra manera oro, e ta mustra un caminda masha bunita, cual e final ta un desaster.
Dios a institui matrimonio, den Genesis 2:18 Dios a mira cu no ta bon pa e homber ta su so. Pesey E a traha for di ribchi di homber e muher, y e homber mes a yame muher pasobra e ta carni di su carni y weso di su weso.
Pesey e homber lo bandona cas di su tata y su mama y uni cu su esposa y nan dos lo ta un solo carni.
Un solo carni , ta nifica un solo carni den tur cos, si bo mira un mucha, bo ta compronde cu su mayornan a uni den un relacion sexual y a produci un yiu, pasobra e palabra di Dios no ta cambia.
Awendia tin hende ta sinti nan mes ofendi ora e berdad wordo presenta cu tur luho y detaye, pero ta dificil pa trose of rechasa e berdad, ora e berdad ta para nos dilanti.
Den un matrimonio e homber y e muher ta uno, uno ora nan ta den oracion, uno ora nan ta den relacion, y uno ora di tuma decision.
Semper ta cos di hari ora bo ta tende un pareha casa ta discuti cu otro bisando, abo a gasta mi placa, enbes di pone cabes hunto y controla gasto, pasobra boso ta uno, ora cosnan no wordo paga, ta boso dos ta sinti, ora no tin cuminda den cas ta boso dos ta sinti, ora muchanan no tin uniform pa scol, ta boso dos ta sinti, awor ta kico mas mester sosode pa boso dos comprende e unidad cu Dios ta demanda di boso den matrimonio.
Den un matrimonio Cristo Hesus ta e cabes ,despues e homber, despues e muher, y despues e yuinan.
Asina cu un muher cuminsa pensa cu e tin mas di bisa cu e homber, y si e homber no ta haci manera e kier, e ta manipula e matrimonio, e cos a sali for di ordo di Dios. Y asina ordo di Dios no ta presente, presencia di scuridad, ta sali na cla, pasobra e enemigo gusta caminda tin rebeldia contra e palabra di Dios.
Tin hopi hende ta puntra nan mes dicon cos no ta cana bon den cas, esey ta sosode ora hende ta purba overrule otro su autoridad, y esey ta trece falta di respet cune, discucion, y division den hogar.
Un muher virtuoso ta corona di su esposo,ma e muher cu ta causa berguensa ta manera, putrimento den su wesonan. ( Proverbionan 12:4).
Den un matrimonio, Dios su naturalesa mester wordo refleha, cual ta Amor,Unidad, y Pordon.
Sea un testimonio bibo di Dios su amor.
Lanta boso yuinan pa sirbi Dios.
Esaki ta Mi mandamento, cu boso stima otro mescos cu Ami a stima boso.
Tur esposo mester respeta y stima nan esposa, y e esposa somete su mes na su esposo.
Ma awor ta keda fe, speransa y amor, ma esun di mas excelente di esakinan ta amor.( 1 Corintionan 13:13.
Sinceramente, Pastor Marcel Balootje
