Den e ultimo 7 añanan di gobernacion di Gabinete Wever-Croes, den conexion cu Dia di Himno y Bandera, Prome Minister Evelyn Wever-Croes ta bishita varios scol pa asina mira con cada scol ta prepara nan alumnonan pa e dia importante aki. E aña aki no ta un excepcion y diahuebs mainta Prome Minister acompaña pa Minister di Cultura Xiomara Maduro a cuminsa cu su bishitanan.
Un di e scolnan cu Prome Minister a bishita e mainta aki ta St Dominicus College. Na su yegada el a wordo saluda pa e scol completo creando asina un experiencia hopi particular y special. Durante su bishita, Prome Minister a combersa cu e alumnonan di klas 5 y 6 y a hacinan varios pregunta di cual uno tabata si nan ta stima Aruba y kico nan ta haci pa demostra esaki. E contestanan tabata hopi varia, algun a bisa cu nan ta demostra nan amor pa Aruba teniendo e isla limpi, otronan a bisa cu nan ta cuida e animalnan, y otronan a bisa cu nan ta mustra respet pa nos himno y bandera.
Prome Minister a expresa di a keda sumamente contento cu e contesta di e alumnonan y di wak con bon e docentenan ta prepara e muchanan pa cu nos dia nacional. El a conseha cada un di e muchanan pa semper ta e miho version di nan mes y pa haci nan best den tur loke cu nan propone nan mes, paso ta asina bo ta demostra bo amor pa Aruba y bo ta hiba nos dushi isla padilanti.
“Mi kier a gradici meneer Mario pa ricibi nos e mainta aki mirando cu cabesante señora Caroline Cardose ta sufriendo un kebrante di salud. Tambe mi kier a gardici e ekipo completo di St Dominicus College pa duna nos e oportunidad di comparti un rato agradabel cu e alumnonan di klas 5 y 6.
Mi ta spera cu e charlanan aki lanta e muchanan nan motivacion pa haci lo maximo pa yuda hiba Aruba padilanti. Nos alumnonan ta bon prepara, nan tin un stimacion grandi pa e pais y pa nos himno y bandera. Mi ta sumamente contento cu na St Dominicus College nan ta inculca e amor pa nos pais, y pa nos himno y bandera den curason di nos muchanan” Prome Minister a expresa.
