Rikesa no ta nifica felicidad, esey ta algo cu nos hobennan mester compronde, y stop di kere cu tur cos ta placa, pasobra si un hende stima bo pasobra bo tin placa, esey ta nifica cu pa 95% ta e placa e stima y no abo.
Hopi biaha hende ta rond di bo pa locual cu bo tin , y no locual cu bo ta.
E amor pa placa ta algo hopi peligroso, e ta un debilidad cu por pone hende cay den inmoralidad y crimen, y hasta costa bo bida y bida di otronan.
Wak pa semper bo keda cu esnan cu conoce bo ora bo no tabatin placa, pasobra eseynan ta esnan berdadero, cu ta stima bo di berdad, pasobra nan sa ken bo ta,
Ora bo bira grandi y bo ta traha y bo hanja un bon posicion, corda riba bo mayornan cu semper a sostene bo, den bon y den malo, y no laga placa haci bo ciego.
Ta e bendicion di Senjor ta haci rico, y E no ta agrega tristesa na dje.( Proverbionan 10:22).
Awor e mundo ta ofrece rikesa cual ta bini cu problema hunto cune, pasobra tin hopi hende rico cu no por cana nan so, y cu tur caminda mester di bodyguard, nan no por disfruta di e bida cu un hende normal por disfruta di dje, pasobra e rikesa, no ta permiti esey.
Tin hende ta asina rico y nan tin tur cos , pero nan no por bay ningun caminda, hasta den nan cas nan tin camera pa wak tur caminda, ora di tuma biento den balcon, nan no por djis cana bay den nan balcon, pasobra nan tin cu wak prome, pasobra nan bida ta na peliger door di nan rikesa.
Ora bo mira un hende cu hopi placa, nunca desea di ta manera e persona, pasobra bo no sa di unda su placa ta bini, nunca pega na un hende pasobra e tin placa, y cuidao pa haci fabor nan sushi pa hende cu tin placa, pasobra mayan cu Dios kier bo a bira nan catibo.
Ora un hende duna bo un cen pa bay cumpra cos, no bira familiar of sinberguensa y keda cu e resto di placa, sin autorisacion di esun cu a duna bo e placa, djis pasobra e persona ta rico, pero sea humilde , decente, y integro y dune e factura y resto di placa.
Nos tur tin mester di placa den nos bida, pero no laga nos bida ta controla y domina door di placa, pasobra esey no ta felicidad, alcontrario esey ta pobresa, pasobra esey ta demostra cu no ta Dios ta goberna nos bida, pero ta placa ta goberna.
Nos salud no ta depende di placa, pasobra a keda demostra cu un hende por tin hopi placa, pero tur esey no por wordo cambia pa su salud.Nos salud semper lo keda den man di Dios.
Cuanto hende no tin hopi placa, pero nan ta biba mentalmente y fisicamente mas preso cu un hende den prison.
Ningun hende por sirbi dos shon, tur cos ta indica den nos bida , cu nos mester busca e reino di Dios y Su husticia y tur sobra lo wordo anjadi na nos.
Pesey: Stima Senjor bo Dios, cu henter bo curason,y cu henter bo alma,y cu henter bo mente,y cu tur bo forsa.Pasobra bendicion berdadero ta bini di Dios solamente, tur cos bon ta bini for di ariba, for di nos Tata cu ta donjo di tur cos.
No laga placa aleha bo for di e caminda fiel y firme di Dios.
Sinceramente, Pastor Marcel Balootje
