Nos muchanan ta e miembronan mas vulnerabel di nos sociedad y ta nos compromiso pa protehanan. Desde inicio na 2017 a bin subraya e necesidad di mas atencion, conscientisacion, cambio di ley, derecho di mucha pero sigur tambe prevencion. Nos muchanan mester mas cu wordo mira como e futuro di nos Pais, nan tin mester di wordo proteha for di chikito.
Como mandatario nos tin e deber pa tuma paso concreto pa trece e tema crucial aki padilanti y nos a bin ta haci esaki tambe desde cu a sinta na september 2021.
Gobierno di Aruba a bin ta reconoce e necesidad urgente pa mas concientisacion y accion, y a oficialmente declara luna di April como Luna di Prevencion di Abuso di Mucha na Aruba aña pasa. E iniciativa aki ta enfoca riba e causanan, prevencion y intervencion necesario pa combati abuso di mucha den tur forma. Durante conseho di minster, un proposicion a wordo presenta pa designa permanentemente April como Luna Nacional di Prevencion di Abuso di Mucha, sigurando cu tur aña, e institucionnan gubernamental y organisacionnan relevante ta traha pa aumenta concientisacion y fortifica proteccion pa nos muchanan.
A traves di diferente plataforma politico, como partner di coalicion a enfatisa continuamente e importancia di proteccion di mucha y a pusha pa politiconan enfoca riba deteccion tempran, intervencion y prevencion di abuso.
“Tur mucha merece crece den un ambiente sigur y cu amor. Haciendo prevencion di abuso di mucha un prioridad nacional, nos ta tuma un paso crucial pa stop e ciclo di violencia y pa sigura un futuro mas saludabel pa e hubentud di Aruba, ambos fisicamente y mentalmente,” segun Minister Arends.
E iniciativa aki ta alinea cu esfuersonan global, manera e National Child Abuse Prevention Month cu a wordo estableci na Merca for di 1983, y campañanan similar na Colombia y Mexico. E ta reforsa e compromiso di Aruba cu e standardnan internacional pa proteccion di mucha y e responsabilidad colectivo di nos comunidad pa combati e problema aki.
Mientras ta traha pa formalisa e iniciativa aki, nos como comunidad mester sigui boga pa Parlamento y Gobierno continua duna prioridad na nos muchanan por ehempel e ley di iniciativa pa derecho di mucha.
Palabra di gradicimento y danki na tur institucion, educadornan, cuidadornan y lidernan di comunidad cu a bin ta participa activamente den e actividadnan di concientisacion durante luna di april y pa sigui traha pa proteha nos muchanan ful aña.
