Salmo 128:1-4.
Bendiciona ta tur esnan cu ta teme Senjor, cu ta cana den su camindanan.
Ora bo come di e trabao di bo mannan , lo bo ta felis y lo bay bo bon.
Bo esposa lo ta manera un mata di wijndruif fructifero, den e parti mas paden di bo cas.
Bo yuinan lo ta manera palonan di olijfi rond di bo mesa.
Mira asina e homber cu ta teme Senjor lo wordo bendiciona.
Nos tur mester stima nos yuinan, pasobra un yiu ta un regalo di Dios, cual Dios ta confia nos cune pa nos como mayor lante den caminda Dios. Pesey ta para scirbi den Efesios 6:4 , pa nos como mayor lanta nos yuinan den e disiplina di Senjor.
Pa bo demostra un mucha cu bo ta stime, bo mester coregi su comportacion, bo no por laga un mucha ta haci locual cu e kier y bisa ta mucha e ta.
Amor no ta nifica cumpra delaster un cos cu bini na moda pa un mucha, djis pa bisa mi yiu tin tur cos, un mucha cu tin tur cos no tin tempo pa sinta cu su mayornan, pasobra e ta ocupa den e cosnan cu boso mes a cumpra pe, birando un mucha materialista sin amor di mayor.
Un mucha mester sinja biba segun e budget di su mayornan, y pa nada di mundo , no por pasa riba e budget di su mayor hincando mayor den debe, pa complace malcriansa di nan yiu.
Malcriansa no ta amor, pasobra for di eynan lo sali falta di respet y manipulacion, cu ora e mucha bira grandi e lo destrui su mes.
Un mucha malcria no ta respeta ningun autoridad, e ta pensa cu e por pasa riba autoridad, haciendo locual cu e kier , mescos cu e ta haci na cas. E no tin manera pasobra su mayornan no a sinje manera, ni tampoco e a ricibi displina y coreccion na cas. Cas ta un free for all, pesey riba caya e ta un problem for all.
Nos tin cu tuma e asunto aki hopi na serio pasobra bijbel ta splica cla den 2 Timoteo 3:1-5 tocante tempo trabahoso, con comportacion di hende lo cambia, y nos ta mira hopi cla den e comportacion di nos hubentud, pesey tin tanto actuacion bobo asina bao di nos hubentud , cu tin hopi mayor ta biba den dolor.
Hoben cu ta pensa:
Cu mester bebe,
Mester droga,
Mester sali tur weekend,
Mester bisti panja indecente,
Mester papia palabra malo,
Mester cana den geng,
Mester cana cu arma,
No respeta polis, esey tur ta pensamento di bobedad, cu diabel ta hinca den cabes di hubentud awendia , pa asina pone nan riba camindad di nan mes destruccion.
Tene bon cuenta kico e palabra di Dios ta bisa;
Pasobra e camindanan di un hende ta den bista di Senjor.
Y E ta vigila tur su berehenan.
Su mes inikidat lo captura e malbado.
Y e lo keda gara den e cabuyanan di su pica.
E lo muri pa falta di instruccion, y den su gran locura e lo desvia. ( Proverbionan 5:21-23).
Esun cu laga di usa bara, ta odia su yiu,ma esun cu ta stime, ta disipline for di tempran.( Proverbionan 13:24).
E situacion ta tenso, e inmoralidad, y falta di respet pa Dios ta aumentando cada dia.
Lanta un famia sin guia di Dios ta imposibel, pasobra pa falta di palabra di Dios, hopi famia ta kibra, y dividi.
Laga nos ban bek na e disiplina di Senjor.
Sinceramente, Pastor Marcel Balootje
