Un bon dia yen di sabiduria den nos alegria ! Danki pa ta un bon rubiano cu ta stima su isla, su famia y ta traha duro pa hiba su mes, su famia y su isla padilanti. Nos arubianonan ta hendenan humilde, balente y cu fe den Bon Dios. Un dushi fin di siman tray lomba ta sigui inspira nos tur pa sigui duna bon Dios danki pa salud, pa bida, pa alegria y pa nos sabiduria. Aruba por a goza di un actividad cultural riba Plaza Padu Diabierna anochi cu varios presentacion di nos artistanan local. Entre otro nos por a wak algo di e anochi bunita aki riba face book, segun mi, e transmision di tele aruba. Un forma cultural cu a scoge y organisa pa a presenta na pueblo e Gabinete AVP/FUTURO cu awor di berdad tin cu cuminsa traha cu amor y seriedad pa Aruba, despues di simannan largo di deliberacion cu instancia – y fundacionnan cu tin mester di un of otro ayudo.
Nos a goza wak nos bunita amiga Vivian Lampe, yui di Juan Chabaya “Padu” Lampe toca piano keyboard cu canto di Victor Samuel, entrepretando nos segundo hymno “Abo so” di Padu Lampe. Nos no a wak ful e programa, pa motibo di otro compromisonan, pero ta sigur cu e tawata un dushi anochi ariba un bunita plaza cu tin hopi tempo sin usa, cu a luci atrobe. Nos a bin topa cu nos prome ministro Mike Eman alaves encarga cu cultura na Cas di Cultura Diasabra atardi na e actividad Arte di Palabra cu participacion di 25 hoben cu nan poema, rap y of storia cortiko, competiendo contra otro pa wak kennan ta bay representa Aruba den e competencianan ABC di Arte di Palabra cu lo tuma lugar e anja aki na nos isla ruman Boneiro.
Nos prome guapo ministro cabayero tawata den compania di su bunita sra.esposa Doina y e gentil cabayero Robert Maduro. Despues nos a mira tambe parlamentario Stefany Sevinger sinta ful dilanti, ora Lady Ruth a bay saca algun pics pa pone den su relato.
Nos a sinta banda di e bunita y simpatico Munye Oduber-Winklaar den e sala di Cas di Cultura y a sucha e prome grupo di hobennan presenta nan bunita obra. Lady Ruth a goza e hoben cu a presenta su obra “Patras di e pantaya tin poder”, papiando di e tecnologia digital cu su shares, likes y comments cu tin biaha por hasi otronan dolor. Nos a nota cu hopi hoben a papia di e tema Amor den diferente bachi. Nos ta puntra nos mes, ta awor nan bida ta cuminsa, ta kiko tanto nan sa di e tema Amor, pero nan a impacta den nan actuacion. Un di e storianan cu a impacta nos tawata e storia di “ Nenny” cu e hoben presentadora no tawata sa sigur si Nenny tawata un mucha muher of mucha homber. Lady Ruth ta hanja cu nos hobennan aki na Aruba a mehora hopi den nan temanan escogi y comparti. Nos islanan ruman Boneiro y Corsouw semper ta bin masha masha masha fuerte mes cu nan representantenan den e competencianan aki di Arte di Palabra.
Nos ta contento cu nos prome ministro alaves encarga cu cultura tawata presente y sigur a anima cu su apoyo y bon discurso nos hobennan talentoso. Y aunke nos a custumbra di wak Xiomara Maduro den e funccion ey, pueblo lo custumbra cu e cara di e carismatico y guapo sr. Mike Eman y beautiful Doina , pareha felis , na eventonan cultural sigur. Un bon comienzo di e Gabinete AVP/FUTURO. Pueblo ta spera di por wak tambe nos vice prome minister e elegante sra. Gerlien Croes tambe na actividadnan asina cu ta toca Ensejanza tambe den futuro sercano. Pabien na e organisadornan di Arte di Palabra y DCA. AdP Aruba tawatatin como maestra y maestro di ceremonia e talentoso Samanta Trinidad y Leo Phillips cu a hasi un bunita papel, teniendo contacto cu e publico regularmente. Algun di e scolnan tawata mas bon representa cu un publico grandi, compara cu e otronan. Pabien na e ganadornan di Arte di Palabra Aruba 2025. Nan mes lo manda e lista pa prensa . Danki pa lesa nos relato di e siman aki. Nos ta desea pueblo di Aruba un bon dia colma di salud na prome lugar. Corda gradici bon Dios pa tur cos bon cu e ta permiti den nos bida. Nos ta desea Gabinete AVP/FUTURO hopi bendicion pa un bon gobernacion y cu cada un persona cu ta den Parlamento traha cu amor pa Aruba. No ta wega di khaki sconde, no ta gana nada cu atakenan personal. Ban traha cu respet pa nos mes y pa otro na maneranan humano y profesional.
Ah si ! Lady Ruth a gusta e bunita outfit dress di Vivian Lampe, di vice prome minister mr. Gerlien Croes y di minister Mervin Wyatt Ras bisti e anochi riba Plaza Padu ! Nice combination y artistico ! Pabien na tur e artistanan cu a duna nan bunita presentacion e anochi ey ! Y awor…..ban traha pa Aruba !! Team work ! Duna y pidi conseho no ta costa nada ! Good luck !
