Tur cos ta posibel si bo tin fe, no tin nada dificil of imposibel pa nos Dios, tur milager ta den man di Dios, Senjor nunca ta laga su yuinan bandona, tampoco desampara.Nos Dios ta den control di tur cos.
E ta cambia nos lamento den baile, nos tristesa den alegria, y nos problema den un milager.
Tur cos bon ta bini for di ariba for di man di nos Tata cu ta den cielo.
Nos Senjor ta fiel, e ta grandi, poderoso, misericordioso, yen di compasion, pa restaura nos bida, tur momento cu nos yega serca dje.
E enemigo ta traha di dia y anochi pa pone yuinan di Dios trompica, pero Dios tey 24/7 pa proteha,sana , restaura y habri porta nobo, ta solamente nos mester confia den dje, y no lubida locual Dios a haci den Job 42:10.
Aunke con duro e situacion den bida porta, laga nos no duda, den e poder di Dios. Pasobra manera ta para scirbi den Jeremias 17:14 asina nos tambe por bisa: Curami Senjor, y lo mi ta cura, salbami y lo mi ta salba, pasobra Bo ta mi alabansa. Nos Dios ta mesun Dios di ayera, awe y pa semper.
Pasobra lo Mi restaura bo salud, y lo Mi cura bo heridanan, Senjor ta declara.( Jeremias 30:17).
Den man di Senjor ningun hende por desespera, pasobra den man di Senjor tin seguridad, pa nos tur, pesey mes e palabra di Dios ta bisa: Bin serca Mi tur cu ta cansa y carga y lo mi duna boso sosiego (Mateo 11:28-30).
Serca Dios nos tin refugio y sosten, nos tin salbacion y bida eterna, pasobra locual Dios por ofrece y duna nos, e mundo no por duna nos, pasobra tur cos di mundo ta temporal, pero cosnan di Dios ta eterno. Senjor a stima nos cu un amor eterno.
Restauracion ta bini door di humildad, oracion, busca cara di Dios, y depende riba palabra di Dios tur momento, manera ta para scirbi den 2 Cronicanan 7:14, cu Dios lo scucha nos oracion y sana nos tera.
Mi conoce bo obranan,Mira Mi ta pone bo dilanti un porta habri, cu ningun hende por sera,pasobra bo tin poco poder, y a warda Mi palabra y no a nenga Mi nomber.
E mundo ta yena cu desesperacion, pasobra scuridad ta aumenta, tempo ta birando trabahoso, inmoralidad ta aumenta,hende ta aleha for di caminda di Dios, bruheria y satanismo ta wordo practica tur caminda, maldad y desobediencia ta wordo apoya, falta di respet a bira algo serio, pero awor ta e tempo di demostra Fe y Confiansa den nos Senjor, ta ora di laga nos lus briya, pa mundo por sa cu nos ta sirbido di Dios, cu ta confia den Dios, nos ta depende complementa di Dios, pasobra den Dios nos speransa ta biba.
Y despues cu boso a sufri pa un poco tempo,e Dios di tur gracia, kende a yama boso pa Su gloria eterno den Cristo, E mes lo perfeciona, confirma,fortalese,y stablese boso.Na dj’E sea e gloria y e dominio pa semper y semper. Amen.( 1 Pedro 5:10-11),
Laga nos no lubida locual Hesus a bisa nos; e cosnan aki Mi a papia cu boso, pa den Mi boso por tin pas. Den mundo boso tin tribulacion, ma tene curashi ,Mi a vence mundo.( Juan 16:33).
Esun cu tin horea scucha, y e esun cu tin wowo mira, awor mas cu nunca ta tempo pa nos gara na Senjor, ta tempo pa nos keda fiel,para den oracion, busca paz y santidad, y mantene temor di Dios.
Sinceramente, Pastor Marcel Balootje
