Si no tabata pa Cristo Hesus nos alma lo tabata perdi, pasobra Cristo Hesus ta e unico Mediador entre Dios y hende, no tin otro caminda pa yega serca e Tata.
Tur hende cu rechasa Cristo awe lo lamenta mayan, pasobra ta esey Dios a splica den Juan 3:16, cu esun cu no kere den Cristo Hesus lo bay perdi, pasobra nan a ninga di kere den e Yiu unigenito di Dios.
Rechaso di Cristo ta lamentablemente un sintoma di rebeldia, enganjo, bobedad, cual simplemente ta perhudica bida di hende, pasobra Hesus a bisa den Juan capitulo 15 cu pega na Cristo nos por tur cos leu for di dje nos no por nada.
Tur esnan cu rechasa Cristo,aki na mundo , E lo rechasa nan dilanti di Su Tata cu ta den cielo.
Ningun hende no por reemplasa Cristo den nos bida, ningun tipo di rikesa of material, e lugar cu Cristo ta ocupa den nos bida ta un lugar halto y eleva, den un palabra bisa, e prome lugar.
Y si nos no pone Cristo na prome lugar, e lo perhudica nos mes, pasobra caminda no tin lus , scuridad lo ocupa su lugar, y nos tur sa kico scuridad ta nifica y for di unda scuridad ta bini,pasobra Dios ta lus y den dje no tin nada, nada di scuridad.
Mundo ta bao di dominio di scuridad , di e malbado, y solamente esnan cu ta sirbi Dios ta resisti e malbado, door cu nan ta somete na mes na Dios, manera ta para scirbi, pasobra sin Cristo Hesus nos no por desvia e plannan famoso di e malbado.
Tin hopi mayor te ainda no kier realisa cu bo no por lanta bo yuinan sin e guia di Dios (Efesionan 6:1-4).
Y si abo como mayor no lanta bo yiu den e caminda di Dios, segun e ta crece bo ta wak kico bo a sembra, pasobra bo deber como mayor coregi, disiplina y stima bo yiu y no lage crece manera un palo dobla.
Loual a sosode na e crus riba sero di Calvario, e sosode un biaha so y pa semper, ey riba e morto di Cristo Hesus a redemi nos for di pica y a drecha nos relacion cu Dios.
No lubida cu ta solamente Cristo Hesus por a bisa:Bin serca mi tur cu ta cansa y carga y lo mi duna boso sosiego.(Mateo 11:28).
Y den Juan 14:1-4, E ta duna nos e garantia pa nos salbacion, cu e promesa cu e ta bay y bin busca nos, den un palabra e ta interesa pa nos ta serca dj’E.
Ta hopi ta esnan cu no kier tende, cu ta trose e palabra constantemente, cu no ta hanja necesario pa reconoce Dios, cu ta bay contra naturalesa y boluntad di Dios,pensando asina cu ta contra hende of contra religion nan ta bay , pero a sali na cla cu ta contra nan mes nan ta (Romanonan 2:5).
No tin salbacion den ningun otro, pasobra no tin bao di cielo,ningun otro nomber cu a wordo duna na hende pa medio di cual nos mester wordo salba.( Hechonan 4:12).
Pa medio di e boluntad aki, nos a wordo santifica, door di e ofrenda di e curpa di Hesus Cristo un biaha pa semper. ( Hebreonan 10:10).
Hesus a bise: Ami ta e caminda, y e berdad y e bida, ni un hende no ta bini serca e Tata sino ta pa medio di Mi.( Juan 14;6).
Nos bida ta pertenece na Cristo, no tin otro, ta solamente den Cristo tin Salbacion.
Sinceramente, Pastor Marcel Balootje
