E ta recomenda tur cu por skirbi, combersa y hasi pregunta na bo mayornan, bo welonan y of bisawelonan si nan ta na bida ainda cuminsa skirbi. Esey ela hasi y skirbi un obra maestro titula : “Faya Lobi”. Tawata su di dos bishita oficial na BNA, nos por corda un crenchi tempo atras ora ela presenta e obra fantastico aki, cu tawata sold out mes ora.
Den un storia cu historia y documentonan y potretnan, e dushi hende aki di nos ruman isla Corsouw pero cu curason arubiano tambe a bin ta skirbi y saca tur locual tawata na su mente, alma y curason di su dushi hendenan, su grandinan, su antepasadonan. Nos ta papiando di drs. Ange Jessurun cu a nace na Corsouw na anja 1954.
Ta hopi cos Ange a hasi den su bida y hopi buki relaciona cu nos idioma papiamento ela skirbi cu su aporte activo di anjanan na e formacion y desaroyo cultural den su lenga materno cu atencion special pa e hobennan. Ange ta e.o. e Mama spiritual di “Arte di palabra” cu ta competencianan exitoso pa e alumnonan di scolnan secundario. Faya Lobi ta su prome storia di amor, su prome “roman” na e idioma hulandes basa ariba storianan cu a pasa di berdad, recuerdonan y documentonan historico E storia di su bisawelo chinees cu a biaha den 1865 for di Hong Kong pa Paramaribo Surnam en busca di un mihor bida.
Esaki tawata e chispa di candela cu a dune mas sed, pone sinta, puntra, busca, rondia y skirbi e storia bibo aki di su mayornan y antepasadonan cu no a sosode un dos tres, pero a tuma un par di anja. Recientemente Ange a bin Aruba atrobe, e biaha aki den luna di April 2025 y a elabora mas ariba su buki Faya Lobi y a comparti di su bishita y participacion interesante na conferencia di lenganan materno na Santiago, e isla principal di Cabo Verde.
E publico presente e anochi aki na Biblioteca Nacional cu cooperacion tambe di Mirto Lacle y di DCA , mes por a scucha y wak hopi palabra cu nan ta papia y usa ayanan na Cabo Verde ta wordo papia y usa riba nos islanan ABC. E bunita presentacion literario aki na BNA tawata den cuadro cu Dia internacional di derecho di autor cu ambiente musical di Gian Giel y Johnny Scharbaay. Danki na Het Nederlands Letterenfonds Caribe, Tante Ange su buki Faya Lobi lo wordo entrega na scolnan di ensenanza secundario aki na Aruba tambe, manera ta e caso na su isla Corsouw y tambe na Surnam a entrega varios buki pa nan biblioteca pa tur por yega na dje pa lesele y na mas lugarnan e buki aki a wordo entrega. Ruby Eckmeyer, Marcia Dirks y Lady Ruth despues a pasa ratonan agradabel cu koffie, broodje en gebak na Bright Bakery den curason di Piedra Plat, combersando y compartiendo topiconan dushi positivo bunita y interesante Diahuebs atardi prome cu e dia liber di Bierna Santo.drs. Ange Jessurun tawata ketobay super happy con su presentacion a bay Diamars dia 15 di April, pasobra e publico a sinti cu cada palabra cu cada expresion di curason, momentonan hopi pret y relahante pa e mentenan cansa di trabao. E”eye contact” cu su publico tawata tremendo, y tawatatin hopi harimento. Ange Jessurun, un shon di hende muhe spontaan y carismatico. Diasabra Tante Ange a bay bek cas trankil, satisfecho cu hopi gradicimento na su humilde pero fuerte curason. Aruba ta stima e gran sra.dama aki, y ta desea Ange tur cos bon den bon salud, alegria y mas sabiduria ! ( Danki tambe na Jhon Freddy di DCA pa saca bunita potret y graba tambe ).
Lieve Ange, hopi exito cu Faya Lobi y danki pa tur locual Ange a comparti cu nos y regala nos scolnan di ensenanza secundario. Nos cas Aruba y nos curasonnan semper habri pa ricibi Tante Ange !
Danki pa lesa nos relato, un “Bearhug grandi diki gordo” pa tur nos bunita y dushi lectornan !
Ah si ! Last but not least : Danki na Jardin Caribe , lieve Vicky, pa e regalo di e rozanan reparti den e publico !Lady Ruth como un autor, a aprecia esaki masha hopi mes !
Cu Pascu Grandi, Pascu di Resureccion, un bida nobo pa nos tur !
