Parlamentario Endy Croes a splica cu e dos ex ministernan di AVP tanto Mike de Meza y Benny Sevinger tin 2.8 miyon florin di pais Aruba secuestra. Mientras La Reina del Sur Gerlien Croes ta lesando stukken pa logra soluciona e situacion na Simeon Antonio su coleganan di Coalicion Eman Croes 1 tin 2.8 miyon di plaka di pueblo secuestra. E placa aki facilmente Gerlien por uza pa construi mas facilidadnan nobo pa Deporte.
Mike de Meza tin un debe di 2 miyon florin na belasting
Di acuerdo cu un splicacion recien adkiri di un right hand di Gerlien Croes cu aparentemente Mike de Meza no lo por bira minister como cu e tin un debe habri na belasting kantoor di 2 miyon florin. Segun e fuente yega na Gerlien Croes cu a divulga esaki ta trata di benta di un compania cual nunca Mike de Meza a raporta na belastingkantoor y tampoco a inclui esaki den su aangifte. Cu e informacion nobo aki y si e ta corecto, ta haci’e sumamente dificil y practicamente imposibel pa Mike de Meza bira minister. Mientras cu Mike Eman ta tratando na tur manera pa limpia nomber di Mike de Meza pa e por logra pasa den wowo di hangua cerca Gobernador tur cos ta mustra te awor cu e intento lo ta envano. Parlamentario Endy Croes ta ilustra cu lo ta mas prudente pa Gerlien Croes pidi Mike De Meza pa e cumpli cu e pago di 2 miyon na belasting. Si Mike De Meza cumpli, Gerlien Croes por ricibi fondo pa traha mas compleho deportivo. Nos no sa e strategia final di Gerlien Croes, como cu Mike de Meza ta e unico Parlamentario cu NO a vota pa Gerlien Croes bira Presidente di Parlamento 8 di januari ultimo y awor cos a bolter. Nos lo come popcorn y mira kende ta bolter cos di berdad!
Hues a dicta cu Benny mester paga 840 mil florin bek
Den un sentencia recien den luna di April 2025 hues a dicta na e ex minister di AVP esta Benny Sevinger mester debolbe pais Aruba 840 mil florin. Den e caso Avestrus Benny a wordo sentencia na 4 aña di prison mientras Ministerio Publico adicional a inicia un ontnemingszaak contra Benny di cual hues a comproba cu Benny a haya Afl.840.000,- na placa y a wordo beneficia di e dealnan di tereno esta dealnan cu patrimonio di pueblo. Tres hues den sentencia di 12 di Juli 2024 a dicta y a kita (incauta) caba 2.5 miyon florin di un cuenta di banco, Orco Bank na Corsou di e man drechi di Benny esta P. Sussebeek. Awor cu prueba riba mesa a gara Benny con mano en la masa unda hues a orden’e y obliga Benny Sevinger di AVP pa paga bek 840 mil florin bek na pais Aruba. Mike de Meza di AVP debe pais Aruba 2 miyon na belasting mientras Benny Sevinger tambe di AVP tin ordo di hues pa paga bek un suma di 840 mil. Hunto De Meza y Benny ambos di AVP tin 2.8 miyon florin secuestra di pais Aruba. Si Gerlien Croes pidi su Colega Geoffrey Wever minister di Finansas pa pusha pa cobra e sumanan aki facilmente Gerlien Croes tin 2.8 miyon florin pa traha mas compleho deportivo.
