Minister di Finansa, Economia y Sector Primario, Geoffrey Wever, hunto cu e delegacion consistiendo di Zulema Erasmus, Maria Dijkhoff Pita, Chito Paris y Emelien Kelly a tene reunionan cu diferente banconan internacional pa evalua e mercado di capital existente. Pa mas di 25 aña caba Aruba ta acudi na mercado financiero internacional.
E banconan tin acceso directo na inversionistanan institucional y conoce e prioridadnan di parti dje inversionistanan. Di otro banda, e banconan mester por comparti cu inversionistanan e ultimo desaroyonan cu tin na Aruba. Demanda pa traha cu Aruba ta keda grandi. Mirando cu Aruba tin un gobierno nobo, banconan kier a tende kico e maneho nobo ta y ricibi informacion di algun aspecto specifico di e maneho financiero y economico di Aruba. Por a nota hopi interes di e banconan y rating agencies pa Aruba.
Banconan a duna espacio pa minister Wever y e delegacion Arubiano expone e maneho financiero y economico pa e proximo 4 aña. Na mes momento minister Wever a ricibi e punto di bista di e banconan riba e situacion financiero y e expectativanan cu tin den e mercado pa e aña aki. Reunionnan a wordo teni cu Banco Santander, Deutsche Bank, JP Morgan y Standard Charter Bank. Diabierna lo continua cu CITI Bank, Moody’s y Standard & Poors.
