Diabierna 25 di april, a tuma luga e ceremonia anual den cual Su Excelencia Gobernador Alfonso Boekhoudt ta otorga condecoracion real na personahenan di nos comunidad cu a sobresali pa nan contribucion excepcional na sociedad. Cada aña ta organisa e ceremonia di “Lintjesregen” den conexion cu e celebracion di cumpleaños di Su Mahestad, Rey Willem-Alexander.
Den e Grand Ballroom di Aruba Marriott, S.E. Gobernador Alfonso Boekhoudt, den presencia di famia, a condecora e ciudadanonan como ‘Lid in de Orde van Oranje-Nassau’. Na e occasion special aki tabata presente Prome Minister mr. Mike Eman, Vice-premier mr. Gerlien Croes y Minister drs. Mervin Wyatt-Ras, cu a felicita cada un di e ciudadanonan aki cu a ricibi e condecoracion.
