Durante e presentacion di Minister Geofrey Wever den Parlamento, un tema cu a resalta fuertemente tabata e preocupacion general rond mundo pa e posibel efectonan di e desaroyonan economico y internacional di Merca riba economianan mas chikito manera esun di Aruba. E decisionnan di politica Mericano, sea riba tereno fiscal, comercial of monetario, tin un alcance global y por crea turbulencia y incertidumbre den mercadonan internacional.
E vulnerabilidad di un economia chikito y habri manera esun di Aruba ta haci cu e ta particularmente sensitivo na e cambionan aki. E relacionnan comercial y financiero cu Merca ta hopi estrecho, y cualkier variacion den e economia Mericano por tin un impacto significante riba turismo, importacion y otro sectornan clave di Aruba. E reconocemento di e preocupacion aki den Parlamento ta un refleho di e realidad economico global interconecta di awe y e necesidad pa Aruba ta proactivo den analisa y responde na e desaroyonan externo.
