Na 2003, e Organisacion Internacional di Trabou (ILO) a cuminza observa e Dia Mundial aki pa enfatisa e prevencion di accidente y malesanan na pia di trabou, capitalisando riba e forsa tradicional di ILO pa cu dialogo social y dialogo .
E celebracion aki ta forma parti integral di e Strategia Global pa Siguridad y Salud na Trabou di ILO, manera documenta den e Conclusionan di e Conferencia Internacional di Labor na juni 2003. Un di e pilarnan principal di e Strategia Global ta promocion, y e Dia Mundial pa Siguridad y Salud na Trabou ta un instrumento clave pa eleva e concientisacion con pa haci trabou mas sigur y mas saludabel y pa enfoca riba e necesidad pa eleva e perfil politico di seguridad y salud na trabou.
28 di april tambe ta e Dia Internacional di Conmemoracion di Trahadornan Morto y Herida organisa pa e movimiento di sindicalismo na nivel mundial desde 1996.
Prevencion di accidente di trabou y enfermedad di ocupacion
E Dia Mundial pa Siguridad y Salud na Trabou riba 28 april ta promove prevencion di accidente y enfermedadnan ocupacional (beroepsziekten occupational diseases) na nivel global.
E ta un campaña di concientisacion pa enfoca mundialmente riba a magnitud di e problema y con pa promove y crea un cultura di seguridad y salud na trabou pa yuda reduci e cantidad di morto y lesionan causa pa trabou.
Cada un di nos ta responsabel pa evita morto y lesionan na pia di trabou.
Gobiernonan ta responsabel pa proporciona e infrastructura (ley y servicio) necesario pa garantisa cu e trahadornan sigui ta empleabel (arbeidsgeschikt) y cu empresanan por florece; esaki ta inclui e desaroyo di un política y un programa nacional y un sistema di inspeccion pa haci cumpli cu legislacion y e maneho di seguridad y salud na trabou.E dunadornan di trabou ta responsabel pa garantisa cu e lugar di trabou ta sigur y saludabel. E trahadornan ta responsabel pa traha cu seguridad y proteha nan mes y no pone otro na peliger y pa conoce nan derecho y participa den e implementacion di medida preventivo.
Riesgo emergente na trabou
Riesgo ocupacional laboral nobo y emergente por ser causa pa innovacion tecnico of dor di cambio social of organisacional, manera:
- Tecnologia nobo of proceso di produccion, p.e. nanotecnologia, biotecnologia
- Condicionan nobo di trabou, p.e. mayor carga di tarea pa haci na trabou intensificacion di trabou debi na reduccion di personal, mal condicion causa dor di migracion en busca di mihor trabou, empleo den e economia informal
- Forma emergente di trabou, p.e. trabou pa proprio cuenta, subcontratacion, contrato temporal
Esaki nan por ser mas ampliamente reconoci a traves di un mihor comprension cientifico, p.e. e efectonan di riesgonan ergonomico di trastorno musculoeskeletal.
Y nan por ta influencia pa cambionan den e percepcion di e importancia di cierto factor di riesgo, manera efectonan di factor psicosocial riba stress relaciona na trabou
TEMA 2025: Revolucionando siguridad y salud.E papel di inteligencia artificial y digitalisacion na trabou
Organisacion Internacional di Trabou (OIT/ ILO) a saca un rapport titula “Revolutionizing Health and Safety. The Role of Artificial Intelligence (AI) and Digitalisation at Work”.
Y esaki tambe ta e tema e aña aki pa Dia Mundial di Siguridad y Salud na Trabou (SST).
Digitalisacion y automatisacion ta transformando miyones di puesto di trabou den henter mundo, creando oportunidad grandi pa mehora siguridad y salud na trabou. Automatisacion y sistema di supervision inteligente por reduci exposicion peligroso, preveni lesion y mehora condicion general di trabou. Sinembargo, e avancenan aki por trece riesgonan potencial nobo cu ta rekiri respuesta politico proactivo y adaptabel.
E rapport ta explora e implicacionan pa SST di e siguiente tecnologia y procesonan:
- Automatisacion y robotica avanza
- Hermentnan inteligente di SST y sistema di supervision
- Realidad virtual y amplia
- Maneho algoritmico di trabou
- Cambionan den organizacion di trabou, incluyendo telework y plataforma laboral digital.
E rapport ta examina maneho politico mundial, regional y nacional cu ta regula SST den lugarnan di trabou digitalisa, destacando e areanan cu falta regulacion y respuesta politico.Tambe e ta analisa e evaluacion di riesgo, participacion di trahador y strategia preventivo pa integra hermentnan digital di un forma sigur y eficaz den e lugar di trabou.
Al ta proporciona idea riba maneho politico, practica y estudio di casonan real, y e rapport ta sirbi como recurso pa gobiernonan, dunadornan di trabou, trahadornan y experto den e ramo di SST nabega den e panorama di evolucion di siguridad digital na trabou.
MENSAHE. GILBERT HOUNGBO, DIRECTOR-GENERAL OIT-ILO
Awe ta Dia Mundial di Siguridad y Salud naTrabou.
Cada trahador, tur caminda, tin derecho riba un entorno laboral sigur y saludabel, cu ta un derecho fundamental.
Sinembargo, miyones di trahador den henter mundo ta sigui muri, keda herida of bira malo debi na nan trabou..Demasiado ta perde nan bida trahando pa gana un entrada. Nos mester cambia esaki.
E uso di tecnologia pa e bienestar general por yuda nos avanza significativamente.
Inteligencia artificial (AI) y tecnologianan digital por yuda transforma e luga di trabou den un espacio mas sigur y saludabel.
Robotica, automatisacion y AI por opera den entorno peligroso y asumi tareanan mas peligroso, manera traha den temperatura extremo, maneha material toxico of nabega den zona di desaster.
Tambe nan por alivia esfuerzo fisico, apoya dunadornan di cuido den hospital, asisti cu carga pisa den construccion, y reduci trabou repetitivo den fabrica.
Sensor inteligente y monitoreo digital por detecta riesgonan promer cu accidente occuri, controlando calidad di aire, monitoreando fatiga, of alerta tocante movimento y comportamentonan insigur.
Pero innovacion tambe por trece riesgo significativo: aumento di vigilancia laboral y maneho algorítmico por menaza derecho, dignidad y bienestar di trahador.
Tecnologia nobo tambe por introduci riesgo nobo cu ainda nos no ta comprende completamente.
Nos tin un responsabilidad pa por comprende e riesgonan di siguridad y salud asocia cu innovacion tecnologico. Nos tin e responsabilidad pa sigura cu tecnologia ser utiliza pa bienestar general.
Pesey e transicion digital mester pone hende central.
Nos mester haci e luga di trabou mas sigur, mas saludabel, mas sostenibel y mas inclusivo.
Riba e Día Mundial di Siguridad y Salud na Trabou, mi ta haci un apelacion na tur gobierno, dunador di trabou, trahador y innovador pa construi un futuro laboral cu no solamente ta mas inteligente, pero tambe mas sigur y saludabel.
