Durante e bishita na Aruba di e presidente di Eerste Kamer, sr. Jan Anthonie Bruijn, y e presidente di Tweede Kamer, sr. Martin Bosma, Minister-President Mike Eman a entrega, den nomber di pueblo di Aruba, algun regalo special cu ta representa e naturalesa y e herencia cultural di nos isla.
Sr. Bosma a ricibi un buki special tocante di e cocolishi di Aruba: “The Archeology of Aruba: The Marine Shell Heritage”. E obra aki ta conta e historia di e habitantenan prehistorico di Aruba y nan relacion special cu naturalesa. E cocolishinan cu den e tempo prehistorico tabata fuente di alimentacion y materia prima pa traha joya, herment y obra di arte, ta awe den nos tempo testigo fisico di un comunidad cu a biba den harmonia cu medio ambiente. Durante di siglo, e monton di coclishi bandona, manera na Malmok, a bira luga arkeologico cu ta conta historia di sostenibilidad, invencion y respet pa naturalesa. Den e buki ta describi, entre otro cos, con e Arubionan original a uza e cocolishinan cu maestria – no solamente pa necesidad basico, sino tambe pa expresa un conexion profundo cu bida y cu lama. E industria di cocolishi di e Arubionan original por tuma como un ehempel di un version inicial di algo manera un economia circular, unda cuminda, herment y simbolismo tabata uni den un estilo di bida sostenibel.
Como un honor adicional, siguiendo cu e tradicion bunita di sr. Bosma pa habri e sesionnan di Tweede Kamer cu un poema, Minister-President Eman tambe a ofrece un poema skirbi pa su mes, titula “Over Zeeën Eén”:
Over Zeeën Eén
Zoals schelpen rusten op verre stranden,
aan Eagle Beach, wit onder de zon,
of langs Scheveningen, nat van de branding,
elk een geschenk van natuur, elk even schoon.
Broeders zijn wij – onder sterren in de hemel,
dragers van een oude, levende verbintenis:
in het Koninkrijk dat niet breekt op de dijken,
maar groeit in de ruimte die tussen ons is.
Verre, nabij, anders, toch één –
in woord, in hoop, in erfgoed bewaard,
een vlechtwerk van eilanden en land, rivieren en steen,
door de oceaan niet gebroken, maar verklaard.
Cu esaki, Minister-President Eman a enfatisa e profundo union den Reino Hulandes – manera un mosaico di isla y pais, uni pa historia, cultura y balornan comparti. Manera e cocolishinan riba playa leu ta testigo di un pasado uni, asina mes e relacion entre Aruba y Hulanda ta refleha un herencia comparti cu ta sigui crece – no apesar di, sino precisamente pa motibo di e espacio y e diferencianan entre nan.
