Minister di Relacionnan di Reino y Enseñansa, mr. Gerlien Croes, a acompaña Presidente di Eerste Kamer Hulandes, Jan Anthonie Bruijn, y Presidente di Tweede Kamer Hulandes, Martin Bosma, den un bishita oficial na EPB San Nicolas cu a tuma luga dialuna atardi.
Durante e bishita, e delegacion a ricibi un presentacion amplio di e variedad di programa y oportunidadnan cu EPB ta ofrece na e studiantenan local. Durante e presentacion a resalta e rol fundamental cu Enseñansa Profesional Basico (EPB) tin den formacion integral di e hobennan, preparando nan pa contribui activamente na e desaroyo di Aruba.
Tanto Presidente di Eerste Kamer como Presidente di Tweede Kamer a expresa nan gran aprecio pa e nivel di enseñansa y e balor practico cu EPB ta ofrece.
Den oranan di dialuna mainta Minister di Relacionnan di Reino, mr. Gerlien Croes hunto cu Prome Minister Mike Eman a ricibi e dos presidentenan. Durante e reunion a dialogo riba varios tema di importancia pa Aruba y Reino.
Minister di Relacionnan di Reino mr. Gerlien Croes a duna di conoce cu tin gran interes di banda di Hulanda pa fortalece e cooperacion den Reino. Mester duna mas contenido y balor na e relacionnan den Reino, y ta sinti cu tin apertura nobo pa traha efectivamente hunto.
