Un caida den e cantidad di turista for di Merca no solamente lo afecta e cantidad di bishitante, pero tambe e Producto Interno Bruto (GDP) nominal di Aruba. Durante un encuentro publico, CEO di ATA, Ronella Croes, a splica cu un scenario hipotetico di un caida di 5% den “tourism receipt” por conduci na un caida di 4% di e GDP nominal. Si e caida alcansa 10%, e impacto riba GDP por ta di 7%. Esaki ta motibo pakico ATA ta trahando activamente pa mantene e stabilidad di turismo y alcansa e meta di crecemento di 1% p’e aña aki, diversificando e mercadonan turistico.
