Durante un conferencia di prensa, Prome Minister di Aruba, mr. Mike Eman den compania di Minister di Salud Publico drs. Mervin Wyatt-Ras y Director di AZV ir. Edwin Jacobs, a anuncia un logro crucial cu ta demostra e compromiso firme di Gabinete AVP-FUTURO cu bienestar di pueblo. Entrante prome di mei, mayoria di e remedinan esencial ta haya bek sin gasto alguno. Esaki ta un alivio pa pueblo cu ya no mester paga mas pa remedi.
E decision iresponsabel tuma pa gobierno anterior pa corta 60 miyon florin den cuido medico, a laga henter pueblo sinti e efecto. Remedi esencial no tabata cubri mas pa AZV, y hopi hende, particularmente esnan mas vulnerabel, a haya nan forsa pa scoge entre nan salud y otro gastonan cu nan tin. Hopi ta esnan cu na momento di busca remedi na botica ta haya nan mes confronta cu cobransa pa paga, mirando cu AZV a stop di cubri un cantidad di remedi, cual tabata crea sentimentonan di desesperacion, impotencia y frustracion.
Pero den apenas un luna despues di huramentacion, Gabinete AVP-FUTURO, den cooperacion estrecho cu AZV, a cumpli cu un promesa: trece bek remedi pa pueblo. Esaki ta un paso firme den direccion di empatia, liderato cu curason, y gobernacion cu ta pone pueblo prome.
Prome Minister Eman a referi cu orguyo na e lucha historico di su ruman homber, ex-Prome Minister Henny Eman dfm, pa funda AZV – un institucion cu awe ta un pilar vital den sistema di cuido medico na Aruba. Prome Minister a enfatisa cu hopi hende no ta realisa e gran bendicion cu nos tin pa tin un cobertura medico cu por yega te den exterior, sin costo adicional pa e pashent.
Prome Minister Eman a duna un testimonio personal, den caso di su casa Doina, cu mester a haya cuido specialisa tanto na Aruba y na Colombia, cu AZV a cubri sin restriccion, y a enfatisa cu esaki ta un derecho cu cada cuidadano mester por sigui conta riba dje.
Finalmente, Prome Minister a gradici ir. Edwin Jacobs, Director di AZV, y tur miembro di e organo ehecutivo aki pa nan dedicacion y profesionalismo pa trece cambio den e lista positivo di remedi cu AZV.
