Den contexto di e bishita di e Vaste Kamercommissie Koninkrijksrelaties, Minister di Finansa, Asunto Economico y Sector Primario, mr. Geoffrey Wever a acompaña e delegacion di Hulanda, consistiendo di Raoul White di Groen Links-PVdA, Aukje de Vries di VVD, Mpanzu Bamenga di D66, y Don Ceder di ChristenUnie, den un bishita na HappyPonics – un di e pioneronan di agricultura comercial na Aruba. HappyPonics ta wordo lidera door di Frank Timmen y Diego Acevedo.
Durante e encuentro, Minister Wever a destaca e importancia di resiliencia local, particularmente den sector agricola. “Seguridad alimenticio no ta un luho, ta un necesidad basico. Cada paso concreto cu nos ta tuma pa stimula produccion local ta un paso mas cerca pa un Aruba mas resiliente,” Minister Wever a indica.
E bishita a enfoca riba:
- Exito real na HappyPonics, un negoshi agricola cu ta produci localmente y cual a beneficia for di e Agri Fund pa amplia su operacion;
- Colaboracion continuo cu Hulanda, incluyendo un estudio actual na man di PRIVA pa evalua e ‘best practices’ pa agricultura comercial na Aruba;
- Preparacion pa e construccion di e Agri-Innovation Park (AIP), un hub moderno cu infrastructura, sistema tecnologico y capacitacion pa empresarionan agricola, destina pa duna impulso vital na e sector.
Minister Wever a resalta cu e Agri Fund, introduci den su ministerio anterior, a cambia e realidad pa hopi empresarionan: “Barera di financiamiento cu tabata limita e crecemento agricola, ta wordo aborda cu producto innovativo manera e ‘Agri Loan’, fruto di colaboracion entre Stichting Qredits y Gobierno di Aruba.”
“Nos ta agradecido pa e interes y compromiso di Hulanda pa yuda cu seguridad alimenticio den Caribe Hulandes. Ta crucial pa e politica na Hulanda por mira cu Aruba ta move – no cu palabra, pero cu accion. E desaroyonan aki ta parti integral di e transicion pa un economia mas diversifica y autosuficiente, cu pone bienestar di pueblo Arubano central” – minister Geoffrey Wever a destaca.
