Como parti di e bishita di trabao di Prome Minister di Hulanda Dick Schoof y den cuadro di fortalece e colaboracion entre Aruba y Hulanda, diadomingo mainta, Minister di Salud Publico Drs. Mervin Wyatt-Ras, a compaña Premier Schoof den un bishita na Hospital Horacio Oduber (HOH).
Jacco Vroegop, Director di HOH, hunto cu miembronan di directiva di hospital, a ricibi Premier Schoof y Minister Wyatt-Ras y a invita e delegacion pa un reunion cu demas miembronan di directiva. Durante di e reunion, a intercambia punto di bista riba e futuro di HOH, e importancia di inverti den capacitacion continuo di personal medico y di enfermeria, y e nesesidad pa reserva puestonan pa nos studiantenan local por specialisa na Hulanda pa por garantisa cuido medico di calidad y moderno pa nos comunidad y bishitantenan. Ademas a intercambia pensamento riba un cooperacion strategico cu Hulanda pa locual ta trata e compra di remedi hunto, pa por haya esaki na prijs mas economico.
Tambe a comparti e preocupacion di pashentnan indocumenta y sin seguro pa cuido medico cu ta un peso enorme riba e fondonan di HOH.
Despues di e reunion, e delegacion a subi na piso cuatro, y a bishita e unidad di Cuido Intensivo (ICU) na unda cu e personal medico a duna un presentacion di e funcionamento di ICU y su rol esencial den cuido critico. Como un gesto di aprecio relaciona cu di Dia di Mama, Premier Schoof a ofrece un regalo di aprecio na e mamanan trahando den ICU.
Gabinete AVP-Futuro ta pone salud publico como un prioridad nacional, y e reunion ta mustra un compromiso pa fortalece e lasonan den Reino Hulandes.
