Ora un hende no sa su identidad, e enemigo ta haci hopi wega cune, pasobra e no sa na ken e ta pertenece, y door di e motibo ey e no tin e autoridad pa reprende e diabel.
Y door di esaki hopi consecuencia negativo por presenta den bida di hende,
Awor esun cu a establece nos huntu cu boso den Cristo y a ungi nos,ta Dios,Kende tambe a seya nos,
Y a duna nos e Spirito den nos curason como garantia.( 2 Corintionan 1:21-22).
Boso no sa cu boso ta e tempel di Dios,y cu e Spirito di Dios,ta biba den boso, Si un hende destrui e tempel di Dios, Dios lo destrui e.Pasobra e tempel di Dios ta santo,y esey ta loke boso ta ( 1 Corintionan 3:16-17).
Of boso no sa cu boso curpa ta e tempel di e Spirito Santo, Kende ta den boso,Kende boso tin di Dios y cu boso no ta pertenece na boso mes.Pasobra boso a wordo cumpra pa un prijs , pesey glorifica Dios den boso curpa.( 1 Corintionan 6:19-20).
Senjor bo Dios,ta meymey di bo, un guerero victorioso,E lo regosiha den bo cu alegria,E lo ta keto den Su amor. E lo regosiha den bo cu grito di alegria.( Sofonias 3;17).
Pasobra tur esnan cu ta wordo guia door di e Spirito di Dios, esakinan ta yuinan di Dios.( Romanonan 8:14).
Awendia hende ta haci hopi cos for di ordo, rechasando berdad y principionan di Dios, y despues bisa “No husgami’ pero un hende mes por samina su consenshi, y sa si e ta den boluntad di Dios, si of no, y no bini cu excuus cu ta hende ta husgabo, pasobra bo curason y bo consenshi ta bisa bon cla, cu bo no ta den e boluntad di Dios y cu ta imposibel pa bo sirbi dos Dios.
Scrudinami O Dios y conose mi curason, purbami y conose mi pensamentonan,y mira si tin cualkier caminda di maldad den mi. Y guiami riba e caminda eterno.( Salmo 139:23-24).
Serca Dios tur hende tin oportunidad, Dios no ta rechasa ningun hende, Cristo Hesus a bisa: Bin serca Mi tur cu ta cansa y carga y lo Mi duna boso sosiego.(Mateo 11:28).
No tin ningun hende asina malo na mundo cu Dios, no por cambie, no tin ningun estado malo den nos bida for di cual Dios no por libra nos for di dje.
No tin matrimonio cu Dios no por drecha, no tin famia kibra cu Dios no por reconcilia.Y den esaki hopi biaha nos ta mira duresa di curason of interesnan financiero y malicia del diablo cu ta pusha hende for di otro, pa asina nan cay den soledad y bira malo.
Y e curason ta mas enganoso cu tur cos,y totalmente corupto, ken por comprende.
Ami Senjor ta scrudina curason, Mi ta samina mente, pa duna cada un segun su conducta, segun e fruta di su hechonan.( Jeremias 17:9-10).
No ta posibel pa hende biba manera e kier, pasobra na final tur hende mester duna cuenta na Dios.
No ta existi e sistema di sirbi Dios manera bo kier, pasobra nos tur tin mester di Dios, y ta nos mester somete nos mes ta Dios, pa asina e diabel no cohe bentaha den nos bida.
Pesey nos mester kibra cu tur mal custumber, tur arogancia y tur orguyo, tur falta di pordon y busca cara di Dios constantemente, pasobra nos ta y ta keda propiedad di Dios.
Ta solamente serca Dios , nos tin e Baranca fuerte, den Cristo Hesus.
Sinceramente, Pastor Marcel Balootje
