Un otro fin di siman a drenta y Aruba ta sperando riba decision di Hues pa loke ta trata e caso contra Departamento di Impuesto di Aruba.
E situacion cu ta sigui desaroya rond di señor Mike de Meza, Parlamentario di partido AVP, ta no solamente preocupante—e ta un insulto frontal na e balornan democratico y integridad institucional cu nos pais ta para p’e y defende.
Señor de Meza, kende no a pasa e proceso di screening obligatorio pa wordo nombra como minister den e gobierno nobo, awor ta keda culpa otro hende, politisa su mes falta y fayonan, y ta troce e berdad y informacionnan di nos departamento involvi, pa influencia opinion di pueblo. Mientras cu e motibo di su rechaso ta cla: su falta di cumpli cu obligacionnan di Impuesto. Esey no ta speculacion—esey ta un hecho administrativo.
Na luga di tuma responsabilidad, señor de Meza a scoge pa tuma accion legal pa forsa su entrada den un puesto ministerial—un movecion cu ta pone duda grandi riba e respet of falta di esaki di señor de Meza pa e proceso legal y ley di Aruba. Mester keda cla: wordo eligi como parlamentario pa pueblo ta un honor. Pero exigi un puesto ministerial sin cumpli cu e rekisito legal y etico, no ta un derecho. E puesto aki ta un privilegio cu mester merece via transparencia y responsabilidad.
Mas preocupante ainda ta cu señor de Meza ta declara cu su exclusion for di e gobierno nobo ta un maniobra politico di partido MEP, e gobierno anterior, pa stroba su intencion di habri investigacionnan cu el a priminti henter su campaña electoral cu e lo haci. De Meza ta kere cu ningun otro den su partido y e partido di coalicion ta capaz pa cuminsa investigtacionnan. Tal tipo di retorica ta engañoso y ta mustra falta di confiansa den su mes y den su coleganan den gobierno actual. Den tur caso, si tin motibo real pa investigacion, e investigacion por wordo haci—pa cualkier miembro di e gobierno nobo, no solamente pa señor de Meza.
Ta bon tambe pa recorda de Meza y pueblo henter, cu Partido MEP no tin miedo di investigacion. Partido MEP mes a laga investiga colega di Partido pasobra e pensamento di Partido MEP ta ‘si bo a causa un blaar, bo sinta riba dje y para responsabel p’e’. Ademas, for di tur investigacion ta cos bon so por sali. Pasobra ta un gobierno cu e goberna na drechi y responsabel tabatin for di 2017 pa comienso di 2025.
E posicion di de Meza y Gabinte AVP/FUTURO den e asunto aki, ta un cu ta duna berguensa. Un posicion sin principio. Aruba no por sigui permiti cu ambicion personal pasa riba e regla di ley. Pueblo merece lider cu respet pa nos institucionnan—no esnan cu ta ataca nos institucionnan ora e resultado no ta cumbini nan.
Pueblo, laga nos defende nos democracia. Laga nos exigi integridad. Y mas importante ainda, laga nos exigi tur mandatario cu ta keda eligi pa representa nos den Parlamento of den Gobierno, cu poder ta un obligacion, no un arma.
