Stima Senjor bo Dios,cu henter bo curason, y cu henter bo alma,y cu henter bo mente. Esaki ta e gran mandamento y e di prome. Y di dos ta semehante, Stima bo prohimo manera bo mes.
Ta parce manera e mandamento aki a wordo lubida , pasobra hende tin amor pa nan mes , y ta lubida riba nan prohimo, hende ta pensa solamente riba nan propio interes, y no ta wak interes di otro, y toch nan ta bisa cu nan ta stima Dios.
E prome caminda cu nos tin cu demostra nos amor pa Dios y pa nos prohimo, ta den nos cas, pasobra e union den famia ta locual Dios ta aprecia, pa asina hende por uni den oracion, y glorifica nos Tata cu ta den cielo.
Caminda dos of ta tres reuni den Mi nomber ey lo Mi ta meymey di nan.( Mateo 18:20).
Pa nos reuni den nomber di Senjor nos curason mester ta recto cu Senjor y cu nos prohimo,
Nos mester ta dispuesto pa pordona, y reconcilia cu otro pasobra asina nos demostra cu e amor di Dios ta biba den nos curason, no solamente di palabra , pero tambe di hecho.
Cada ken mester pone nan curason recto cu Dios, pasobra cada ken tin cu duna cuenta personal na Dios, ningun hende no por duna cuenta di otro, ni maske cuanto nan stima otro.
Pas Mi ta laga pa boso,Mi pas mi ta duna boso,no manera mundo ta duna, Mi ta duna boso. No laga boso curason bira intrankil, ni lage tene miedo.(Juan 14;27).
Nos tur por mira con pas ta wordo negocia entre Russia y Ucrania, y a base di esey nos por tuma un ehempel kico Dios ta papia di pas, pasobra eynan nos por mira cu e pas ey no ta di Dios, pasobra e condicionnan cu nan ta pone pa otro no ta bini di Dios, pero di curason cu kier domina otro.
E pas di Dios ta simpel. Berdadero, amabel, sin ningun clase di mamipulacion of discriminacion, puro sin hipocrecia, lew for di amargura, y cu hopi respet y amor pa otro.
Ora nos curason ta recto cu Dios, nos por biba na pas cu otro, sin tin cu tira cos nan cara di otro, evita di tur manera pa ofende otro y bay den pasado di otro, ya cu nos ta consciente cu mescos cu Dios a pordona nos, nos picanan, tambe Dios ta pordona di nos prohimo.
Ta nos tur mester di Dios den nos bida, nos tur mester di Su misericordia . Su gracia, y Su fabor, ningun hende por biba independiente di Dios, Dios ta tur cos pa nos, y Dios ta donjo di tur cos.
Senjor ta serca di tur esnan cu ta sclama na dj”E den berdad. E lo cumpli cu e deseo di esnan cu ta tem”E:tambe e lo tene nan sclamacion y lo salba nan.( Salmo 145:18).
Un cos mi ta desea di Senjor,esey lo mi busca,cu mi por keda den e cas di Senjor, tur e dianan di mi bida, pa contempla e bunitesa di Senjor, y pa medita den Su tempel.( Salmo 27;4).
Pesey esun cu confesa Mi dilanti di hende, esey lo Mi confesa tambe dilanti di Mi Tata cu ta den cielo. Ma ken cu ninga Mi dilanti di hende, esey Mi tambe lo nenga dilanti Mi tata cu ta den cielo.( Mateo 10;32).
E amor di Dios ta asina grandi y precioso pa nos, cu no tin nada riba e mundo aki cu por compara, of iguala cune.
Sinceramente, Pastor Marcel Balootje
