Den Corte Superior: Procurador General a exigi 6 aña di prison pa homber cu a tira riba auto
Dialuna den Corte Superior, Hof, a trata e apelacion di e homber G.C.(30, kende a wordo condena na 6 aña di prison pa a tira riba un auto.
SOLO DI PUEBLO por a compronde cu Procurador General a exigi 6 aña di prison mientras cu abogado mr. D.Croes ta haya cu mester declara G.C. liber.
Procurador General a acusa G.C. cu riba 1 Januari 2024 a tira riba un auto den cual tabatin un pareha. Esaki ta wordo considera, intento di mata. Tambe Procurador General ta haya cu G.C. tabatin un arma di candela.
Na Mei 2024, Hues a bisa cu ta legalmente proba cu G.C. riba 1 Januari 2024, a purba mata e pareha den un auto. Tambe cu G.C. tabatin un arma di candela. Hues a condena G.C. na 6 aña di prison.
SOSPECHOSO TA NENGA DI A TIRA
Dialuna mainta Procurador General a acusa G.C. cu riba 1 Januari 2024, a purba mata un pareha den auto. Tambe Procurador General a acusa G.C. di posecion di arma di candela. Ta asina cu G.C. a apela e castigo pasobra e ta para riba cu e ta inocente.
Hof a puntra G.C., kico a pasa. G.C. a splica cu bispo di aña el a bay na un lugar, caminda e tabatin discusion cu e homber S. tocante un debe y cu G.C. a regla esaki. Un amigo a bisa G.C. pa no haci caso y pa cana bay. Nan a cuminsa cana bay na na dado momento G.C. a mira su amigo M. a baha cabez y a bisa G.C. cu un boter a hera dal’e. G.C. a sigui bisa cu 1 Januari 2024, e tabata na cas di su mama tirando klapchi y huma marihuana cu un amigo. Na dado e amigo a bay baño y el a keda den cura. El a mira un auto cu luz bright bin for den direccion contrario. Na dado momento el a scucha un homber bisa, “mi ta bay tira bo”. Esey tabata e homber S. E momento ey G.C. a spanta y a core drenta cas. Ora el a sali bek pafor, e auto a bay. Hof a mustra cu e amigo di G.C. cu tabata na e cas, A., a declara cu el a sende 2 klapchi y G.C. no a tira klapchi. Na dado momento A. a bay orina den e cas y no a scucha G.C. tira klapchi. El a bisa tambe cu G.C. no a bis’e nada di cu tabatin un problema cu S. Hof a sigui bisa cu e pareha den auto a bisa cu nan a mira G.C. a saca un arma y ora nan a core bay, nan a scucha un sonido y e windshield patras di e auto a kibra. G.C. a desmenti completo cu el a tira y cu tampoco su amigo A. lo a tira
Hof a bisa cu Polis a haci investigacion y a constata un buraco den e windshield patras y a haya un bala den e radio di e auto. Polis a haya tambe, 9 dia despues, partinan di glasnan kibra di e auto riba caminda serca di e cas di mama di G.C. G.C. a bisa cu e no tabatin arma y ningun momento el a tira. El a bisa Hof, cu e ta haya straño tur esaki y no por bisa con e windshield patras a kibra. El a bisa Hof cu e no ta tipo di persona asina. El a admiti di a bebe alcohol y huma marihuana pero no cu e tabata hopi bou influencia.
Segun G.C., awor cu e ta sera den KIA el a bin haya sa cu S.J. tin hopi problema. G.C. ta para riba cu e no tin nada di haci cu e caso aki. G.C. a bisa cu e tin 16 luna sera den KIA y ta haya cu S.. y su pareha M. a gaña riba dje, pa e bay sera.
6 AÑA DI PRISON EXIGI
Procurador General a bisa Hof cu e ta haya legalmente proba cu G.C. a tira y ta pidi Hof pa confirma e sentencia di 6 aña di prison.
DEFENSA
Mr. D.Croes a bisa Hof cu PG no por a demostra cu G.C. ta esun cu a tira y pesey ta pidi Hof pa declara G.C. liber. El a mustra cu S. a haci menazanan serio riba G.C. Despues S. ta bay cu auto te na cas di G.C. y a bis’e cu e lo bay tir’e. E ta kere cu si G.C. a tira, hendenan lo a core y lo tabatin hopi desorden. Pero esey no tabata asina.
Mr. Croes a bisa Hof cu tur esnan cu tabata na e cas ta bisa cu G.C. tabata paden den cas y no pafor manera e pareha ta bisa. Pa loke ta tiramento, e abogado a mustra cu e pareha M. y S. ta bisa cu ta pafor di e cas G.C. a tira y despues ta bisa cu ta paden di cura G.C. a tira. E abogado ta haya cu e declaracion di e dama M. y e homber S. ta contradictorio y no por saca afor kico realmente a pasa. E no ta haya cu tin suficiente prueba cu G.C. a tira riba e auto.
E abogado a remarca, con por ta posibel cu Polis no a haya huls. Mr. Croes a mustra e scenario cu ta S. mes a tira riba su auto pa asina G.C. bay sera. Abogado a bisa Hof cu e ta haya cu mester declara G.C. liber.
Hof a bisa cu dia 11 Juni pa 1.45 merdia lo tin sentencia.
