Tin hopi mal influencia den aire especialmente ora nos mira con rebeldia ta aumenta di tur forma, tanto serca mucha como hende grandi, hendenan ta celebra maldad y inmoralidad, y ta rechasa bondad di Dios.
Malicia y inmoralidad ta wordo aplaudi, perversidad ta broma como moda, palabra sushi a bira un arte, ta un berguensa pa tende y mira con den un famia, tata , mama y yiu ta confronta otro cu palabra malo, ta parce manera manera Efesionan 4:29-30 a wordo saca for di Bijbel pa nan.
Awendia ni cas di Dios, ni tampoco e vecindario di cas di Dios ta wordo respeta, e temor di Dios a bira anticua pa hopi hende, y nan mente ta solamente riba cosnan carnal.
1 Corintionan 16:33 ta bisa; No laga ningun hende ganja boso, mal compania ta danja bon custumber.
No tin nada mas fastioso cu cana cu mal amistad, mantene amistad cu hende cu no tin respet pa Dios, djis pasobra nan tin placa of nan ta esnan cu bo ta depende riba dje..
Ta tempo pa aleha for di hende di mal pensamento, inmoral. violento, sensual, abusivo y busca amistad berdadero cu Cristo Hesus, Kende ta e unico mediador entre Dios y hende.
Proverbionan 13:20 ta para scirbi: Esun cu anda cu hende sabi, lo ta sabi, ma un companjero di hende bobo, lo sufri danjo.Cuanto hoben no a cay sera of perde nan bida pa motibo di cana cu hende sin escrupulo y bao di mal influencia.
Ora un mucha kier sinti su mes grandi, no ta tur biaha ta un bon influencia, pasobra diesocho anja no ta haci bo algo special, pero e ta nifica bo a drenta den un etapa cu bo mes tin cu realisa cu sieriedad den bida ta algo importante, y cu tur locual bo sembra bo ta cosecha, pero tur hoben mester sa cu aunke con grandi bo bira bo mester keda respeta, y honra bo mayornan, diesocho anja bo ta keda mesun yiu.
No sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios.( Romanonan 12;2).
Ma e Spirito ta bisa claramente cu den ultimo temponan algun lo cay for di Fe, door di paga atencion na spiritonan enganjoso y doctrina di demonjonan , pa medio di e hipocrecia di ganjadornan, kende nan mes consenshi a wordo kima como si fuera ta cu hero cayente esaki a wordo haci.( 1 Timoteo 4:1-2).
Pesey awor aki bo ta hanja hende ta apoya bibamento, enbes di casamento pa ley y pa iglesia, pasobra asina manipulacion y confusion por keda reina den e relacion, y ningun di dos ta confia otro.Y cada rato tin e confrontacion cu nan por aparta for di otro. Y no tin sometemento, pero tin competencia.
Wak bon con interes den amor berdadero a baha, y tur cos a bira interes financiero,of interes sexual, of interes di herencia, hende ta wak kico nan por hanja den un futuro, un muher ta sinja su esposo con pa lanta un caso contra su propio famia pa nan por hanja un cas cu nan no tin ningun derechi.djis pa golos y envidia.
Un persona ta divorcia pa e otro mantene tur luna, pasobra nunca e a stima, su deseo ta pa biba un bida sin preocupacion a costo di otro su sufrimento.
Di berdad e mal influencia ta yena den aire, y si no tin bida di oracion, e por influencia, mente y curason di hende.
Sinceramente, Pastor Marcel Balootje
