Mirando tur e surplus cu AZV ta indica cu tin, fraccion di PPA kier recorda comunidad completo, cu nos no por lubida, con den pleno pandemia a haci un recorte barbaro den sector di cuido. A corta 5.5% pa luna den e lumpsum di Imsan, Respaldo y Hospital, cu sigur tabatin un impacto y efecto devastador. E empleadonan di sector di cuido mester a entrega 5.5% di nan salario pa 6 luna largo y mester a simplifica nan CAO.
Indexering no pa tur!
“Recientemente nos a bin haya den nos postbus, un paskin (carta), caminda ta indica cu aña pasa un grupo di ambtenaar a goza di nan indexering, pero cu lamentablemente no tur empleado por a conta cu e mesun suerte aki,” Eduard Pieters di fraccion di PPA a comparti. Esaki sigur ta di lamenta masha, specialmente mirando cu den e periodo di COVID-19, un pandemia cu a sorprende Aruba y mundo henter, e grupo di profesional aki tabata prome yama pa ta na pia di trabou, combatiendo, sacrificando y exponiendo nan mes y famia, pa saca pueblo di Aruba for di e garanan di e pandemia.
Carta di peticion di ABV
ABV (Arubaanse Bond van Werknemers in Verplegende Instellingen )a manda un peticion formal na directiva di Hospital, unda ta pidi pa e enfermeronan y otro personal di cuido, haya mesun aumento di salario, basa riba indexering di 11.7%, mescos cu e ambtenaarnan. Segun Pieters: “Loke ta straña nos fraccion ta, mientras AZV a haci un recorte y hasta tin un surplus, pues tin placa disponibel y sigur ta duna espacio pa compensa tambe e grupo di trahadornan den sector di cuido.”
Kico ta bay haci cu e surplus di AZV?
“Fraccion di PPA ta completamente di acuerdo cu e punto den e carta, unda ta subraya cu e enfermeronan ta un pilar esencial den nos sistema di salud y sin nan, ningun specialista por traha” Eduard a enfatisa. E costo di bida a subi hopi y nos tin cu evita cu e personal crucial aki ta haya motibo pa sali for di e sector. Den pasado a duna aumento den salario, mescos cu e ambtenaarnan y esey ta loke ABV ta boga p’e.
“Bo no kier ta na punta di faha”
Na Papiamento tin un dicho: Bo no kier ta na punta di faha. “Pues cu otro palabra, ta cauteloso y ta bon pa gobierno no lubida kico a pasa den 2008, unda cu tur e ambtenaarnan a sali manifesta pa nan indexering”, segun Eduard Pieters. PPA como fraccion tambe ta urgi gobierno actual y e dunadonan di trabou pa considera seriamente e peticion di ABV aki y ahusta e salario di nos empleadonan den sector di cuido y duna bek loke a kita di nan. Esaki no ta un privilegio, sino un accion husto y di respet pa e grupo di trahador aki.
