A bira un custumber pa hende contradeci e palabra di Dios.
Cada rato bo ta tende cu ningun hende no ta perfecto, no tin famia perfecto, no tin cas perfecto, y hopi cos mas cu ta contradeci e palabra di Dios y hiba hende na un bida mediocre.
Ora nos ta declara cu nos mes boca , cu nos no ta perfecto, nos mes ta yama pica y eror den nos bida.
Si un mucha lanta y tende den cas cu su mayornan ta contradeci e palabra di Dios, e mucha ey sigur lo haci cosnan robes pasobra e ta bay tras di e palabra cu su mayornan ta bisa, enbes di busca pa bira mihor.
Y esey ta e plan di diabel, pa hende pensa cu nan no por bira perfecto, pa asina nan keda den gara di scuridad, y permanece den inmoralidad.
Dios nunca ta pone un carga riba nos cu nos no por carga. Pesey lesa bon locual e palabra di Dios ta bisa.
Mateo 5:48 ta para scirbi: Pesey boso mester ta perfecto, mescos cu boso Tata celestial ta perfecto.
1 Pedro 1:13-16 ta para scirbi: Pesey , faha e hepnan di boso mente, sea sobrio,fiha boso speransa,completamente,riba e gracia cu lo wordo treci na boso na e revelacion di Hesus Cristo.
Como , yuinan obedecido, no conforma boso cu e pasionnan cu boso tabatin antes,den boso ignorancia, ma mescos cu esun Santo cu yama boso, boso mes tambe sea santo eden tur boso conducta. Pasobra ta para scirbi: Boso lo ta santo, pasobra Ami ta santo.
Otro prueba mas cu ta para scirbi ta Hebreonan 12:14 bisando: Aspira pa tin pas cu tur hende , y santificacion, sin cual ningun hende lo no mira Senjor.
2 Corintionan 5:17 ta cuminsa na splica nos cu: Si un hende ta den Cristo,ta un criatura nobo e ta, e cosnan bieu a pasa caba,tur cos a bira nobo.
Eynan e transformacion ta cuminsa, for di un bida rebelde y con cu ta, pa un bida den perfeccion y santidad den Cristo Hesus, pasobra nos tin cu corda cu ta solamente den Senjor y den Su poder nos tin forsa.( Efesionan 6;10).
E bida den Cristo Hesus , mester keda na e nivel den cual E a yama nos pa biba.Pasobra ta para scirbi den 2 Pedro 3:14 bisando; Pesey stimanan, como cu boso ta spera e cosnan aki, sea diligente,pa E hanja boso den pas, sin mancha y sin culpa.
Nos tur sa cu nos tin cu biba un bida cu ta agrada Dios den tur cos, pasobra Cristo Hesus a bisa den Juan 14:1-3 cu E bay prepara lugar y E ta bin bek bin busca nos. Y nos mester tene cuenta cu esey pa evita cu ta pasa cu nos manera e cinco birgennan den Mateo 25.
Ora hende keda ripiti mesun cos cada rato, e cos ey ta drenta bo bida, pasobra hopi hende no ta na altura, cu bo mes boca por contamina bo bida papiando cosnan contra e palabra y boluntad di Dios.
Ensenjansa nan contrali a drenta, pa asina hende biba mediocre y no alcansa locual Dios tin pa nan.
Si un hende ta practica un deporte, y e mes ta bisa cu su boca, cu nunca e lo bira un profesional, e mes ta limita su mes, e mes ta stroba su crecemento, e mes ta keda atras, pasobra e mes ta papia contra su mes.
Senjor kier pa nos ta perfecto den dj’E y biba den pas y Santidad.
Sinceramente, Pastor Marcel Balootje
