Diabierna mainta Wilfred Besaril y Glen Ling a presenta den Corte di Husticia acompaña pa nan abogado pa scucha e exigencia di Fiscal den e caso di malversacion di placanan na Aruba Huis.
SOLO DI PUEBLO por a compronde cu Fiscal ta haya Besaril y Ling culpabel di malversacion di placanan di Aruba Huis y mal uso di nan funcion. El a exigi 2 aña di prison pa Besaril y 1 aña di prison pa Ling.
MALVERSACION DI PLACANAN DI ARUBA HUIS
Fiscal a bisa cu entre 2017 y 2021, e malversacionnan a sosode na Aruba Huis na Hulanda, caminda Besaril, como Minister Plenipotenciario, a usa placanan di Aruba Huis pa haci cosnan priva pa su mes. Fiscal ta haya cu Besaril no a sigui reglanan di procedura, caminda mester pidi aprobacion promer. Fiscal ta haya cu Besaril a usa carchi di credito di Aruba Huis pa bay come y haci otro cosnan. Na opinion di Fiscal, Ling tambe a aproba tur esaki door di firma tur e facturanan di cobranza di Besaril.
Fiscal a mustra cu na 2019 a cuminsa un investigacion, despues cu Paris a manda carta mustrando cosnan cu ta pasando y Minister Presidente a haci denuncia. Central Accountant Dienst (CAD), a haci investigacion y a traha un raport. Landsrecherche a cuminsa cu investigacion cu a conclui cu tabatin malversacion di placanan di Aruba Huis. Fiscal a bisa cu e aprobacion di Ling ta wordo considera como complice di malversacion. CAD ta haya cu Besaril y Ling no a usa e placanan di Aruba Huis corecto.
** Fiscal a mustra cu e facturanan di Setar cu ta relaciona cu uso di telefoon di Besaril na Aruba. Na cas di Besaril su tata y na cas di Besaril a instala telefoon y internet. Fiscal a señala cu tin gastonan na cas di tata di Besaril siendo cu Besaril tabata na Hulanda. CAD ta haya cu no tabatin spaarmento di gastonan. A paga mas cu 14 mil florin na Setar siendo cu Parlamento no ta di acuerdo. Fiscal a bisa cu tin personal di Aruba Huis no tabata di acuerdo cu e cobranza, pero riba orden di Ling, cu a aproba e cobranzanan, a paga.
** Fiscal a mustra cu 50 mil Euro a gasta na drecha e cas cu Besaril a scoge pa biba aden. E ta considera esaki malversacion. El a mustra cu dos aָña despues di tabata na e cas, Besaril kier pa haci reparacionnan. Na opinion di Fiscal, sin cu a pidi autorizacion pa haci esaki, e facturanan a wordo firma pa Besaril y Ling. Tambe 21 mil Euro a gasta pa drecha e jardin. Fiscal a mustra cu CAD ta haya cu e gastonan ta mas bien priva. El a bisa cu di parti di Gobierno a reclama cu no tin descripcion di e trabaonan y Ling como director a constata gastonan exagera pero no a informa Minister Presidente.
** Fiscal a mustra cu na 2018, Besaril a haci 6 mil Euro di gasto na mueblenan pa e cas. Esaki no ta wordo considera como gastonan pa e cas sino gastonan pa probecho personal. Fiscal a sigui bisa cu Besaril no a haya aprobacion di Conseho di Minister pa a haci e gastonan aki. Na dado momento Besaril a dicidi cu mester instala sistema di alarma. CAD a constata cu no a busca ofertanan sino a deal cu un compania. No a sigui e procedura cu mester a sigui y Conseho di Minister no a proba esaki. Tambe Fiscal a cuestiona e hecho cu tin gastonan pa haci cas limpi cual no mester cay riba gasto di Gobierno. Ademas di no a pidi aprobacion di Conseho di Minister pa esaki, Besaril a manda facturanan pa paga. Fiscal a cuestiona cu Ling su forma di control ta laga di desea. E ta haya cu si Ling no por a haci e trabao, e mester a baha y laga otro haci e trabao aki.
** Fiscal a mustra riba gastonan di 20 mil florin pa trabaonan di relacionnan publico cu Besaril a paga un compania, siendo cu Gobierno tin su mesun hendenan. CAD ta considera esaki como algo priva. Tur e facturanan a wordo paga. Segun facturanan, ta trabaonan haci durante viaha di trabao di Besaril.
** Fiscal a mustra cu Departamento di Finanzas ta haya cu Besaril tabata haci gastonan priva cu no tin nada di haci cu su trabao como Minister Plenipotenciario. Fiscal a menciona estadia di Besaril na Aruba caminda a haci uso di VIP y tambe gastonan di huur di auto. E tabata haci uso di e carchi di credito di Aruba Huis. CAD ta considera esaki gastonan priva y no gastonan relaciona cu su funcion. Segun Fiscal, Besaril no a responsabilisa su mes pa e gastonan haci.
Fiscal ta haya cu Besaril y Ling a mal usa nan funcion. Ling ta complice di malversacion pasivo o sea, e no ta haci’e intencional sino djis firma facturanan. Besaril si a haci malversacion intencional.
FISCAL A EXIGI CASTIGO DI PRISON
Fiscal ta haya cu Besaril y Ling ta complice di malversacion. El a exigi 2 aña di prison pa Besaril. Fiscal a exigi 1 aña di prison pa Ling, di cual 6 luna ta condicional cu un tempo di prueba di 3 aña.
BESARIL MESTER PAGA CASI 220 MIL FLORIN
Fiscal ta haya Besaril mester paga bek 199.482 florin na Gobierno, di tur e placanan cu el a malversa. Si no paga esaki, Besaril mester bay 3 aña sera den prison.
Hues, despues di a scucha e defensa di abogadonan y cu Besaril y Ling a expresa nan mes, a bisa cu dia 13 Juni 2025 pa 1.30 di merdia, e lo sera tratamento di e caso y dicta sentencia.
