Situacion na Colegio Arubano ta birando preocupante. Segun informacion cu Solo di Pueblo a haña for di fuente den e scol mes, tin mas cu 10 docente a indica cu nan lo bandona Colegio Arubano pa bai traha na otro scol.
Docentenan ta expresa nan descontento profundo cu e manera cu e scol ta wordo maneha bou di liderazgo di e presidente di bestuur actual, Sra. Mariska Dania.
Segun nos a bin compronde, e tension den e scol a yega un nivel cu e rector anterior, Sr. Tim Croes, a tuma desicion di sali mei-mei di e aña escolar 2023-2024. Esaki, segun nos fuente, pa motibo cu e no por a traha mas bao di e presion y desacuerdo cu Dania, kende ta dirigi e bestuur di Colegio Arubano.
“E no tabata laga Sr Croes hasi su trabou manera mester. Tur cos tabata wordo maneha for di Dania mes. Nos a mira cu comosifuera e tabata directora tambe,” un di e docentenan anonimo a bisa.
Un otro punto preocupante ta cu nan a stop e stage pa stagiaires, locual ta pone un obstaculo pa studiante cu ta depende di practica pa por gradua. Sin stage, hopi por no logra termina nan su formacion di docente.
Ademas, segun fuentenan interno, hubentud lo keda sin guia, sin continiudad y sin motivacion, ora cu e bon docentenan ta saliendo un pa un.
Un otro miembro di bestuur, señor Eric Illes, cu tabata goza di confiansa di docentenan, supuestamente a sali tambe, pa motibo di conflicto interno cu Dania.
Na otro banda, ta wordo indica cu docentenan tabata precupa cu Dania kier a hinca su yiu den scol, sin cu e tin e bevoegdheid necesario pa e puesto.
“E señora aki no ta comunica cu respet, y nos no por traha den un ambiente asina. Nos ta maestro, pero tambe hende cu dignidad,” e fuente a agrega.
Kiko ta pasando den Colegio Arubano?
E pregunta ta cla: Kico ta pasando cu e scol cu ta nos orguyo y cu ta forma nos hobennan pa tuma over funccionnan importante den nos comunidad?
Rector a bai, Docentenan ta saliendo, stagiaires sin por stage, un ambiente di miedo i desmotivacion.
Docentenan ta pidi pa ministerio di Enseñansa y obispado tuma accion de inmediato, pa investiga e situacion y restablece un ambiente cu ta propicio pa enseñansa di calidad.
