Den cuadro di su bishita na Corsou pa atende e Caribbean Climate & Energy Conference 2025, Prome Minister di Aruba, mr. Mike Eman, den su prome bishita oficial despues di a huramenta como Premier di Gabinete AVP-Futuro, a atende algun reunion esencial cu figuranan prominente di Corsou. E bishita ta parti di un esfuerso strategico pa reafirma y amplia e contactonan cu a establece durante añanan di colaboracion entre e islanan den Reino.
Prome Minister Eman a cuminsa cu un dialogo strategico cu sra. Emily de Jongh-Elhage, ex-Prome Minister di Antiyas Hulandes y actual Minister van Staat, un figura respeta pa su amplio conocemento den maneho di gobierno insular. Tambe a tene reunion cu sra. Maria Liberia-Peters, tambe ex-Prome Minister di Antiyas Hulandes y Minister van Staat, pa fortifica e laso y colaboracion entre Aruba y e otro partnernan den Reino.
Ambos ta personanan cu ta cerca den curason di Prome Minister Eman, cu ken a comparti ideanan comun pa un relacion constructivo den Reino. Nan ta personanan cu hopi experencia y conocemento di e retonan cu e islanan den Reino ta enfrenta. Como ex-lider, nan a pasa den tempo di crisis y situacion di pobresa, pero a enfrenta esakinan cu curason y alma, semper cu e meta pa sirbi e pueblonan di Antiyas.
E reunionnan aki ta subraya e compromiso di Aruba pa sigui traha riba base di union, respet mutuo y desaroyo conhunto den Reino.
Ademas, Prome Minister Eman a topa cu sra. Michèle Russel-Capriles, Waarnemend Gouverneur di Corsou, cu ken a comparti un vision cla pa futuro di naturalesa na Aruba. Durante e encuentro, a comparti e plan nacional di Aruba pa reforestacion pa proteha y trece bek nos naturalesa y recobra e identidad cultural di nos isla, como base pa sontenibilidad y bienestar di e pueblo Arubano.
